შალვა პაპუაშვილი: „ნახევრად ფეხმძიმობა“ არ არსებობს - ან არიან პარლამენტის წევრები, ან არა, ასე რომ, ჩამოყალიბდნენ და ნუ იგდებენ თავს სასაცილო მდგომარეობაში

თავი არ უნდა ჩაიგდონ ასეთ მდგომარეობაში. აბსოლუტურ სისულელეს ამბობენ, რომ მხოლოდ 8 %-ია ლეგიტიმური და დანარჩენი 92 % - არა. „ნახევრად ფეხმძიმობა“ არ არსებობს - ან არიან პარლამენტის წევრები, ან არა. ასე რომ, ჩამოყალიბდნენ და ნუ იგდებენ თავს სასაცილო მდგომარეობაში, - განაცხადა საქართველოს პარლამენტის თავმჯდომარემ შალვა პაპუაშვილმა, აჭარის საზოგადოებრივი მაუწყებლის ეთერში, გადაცემა „თავისუფალი სივრცეში” სტუმრობისას.

პარლამენტის თავმჯდომარის თქმით, გახარიას პარტიის წარმომადგენლებს როგორც გარედან უთხრეს, ისე მოიქცნენ, ისინი საკუთარი ქვეყნის ინტერესებზე არ ფიქრობენ და სხვა ქვეყნის ინტერესებს ატარებენ.

„დღეს ვნახე, რუსთავის მერობის კანდიდატის - კეკენაძის ბრიფინგი, სადაც ის არალეგიტიმურობაზე საუბრობს. მან 2500 ხმა მიიღო რუსთავში, „ქართულმა ოცნებამ“ კი - 1 107 000 ხმა. ჩვენ გვესაუბრება 2500 ხმის პატრონი ლეგიტიმაციაზე? სასაცილოა... ამ ყველაფერს ხომ ვამბობდით? ეს პირველად არ ხდება. 2020 და 2021-შიც ასე არ მოხდა? 2020-ის შედეგები არ აღიარეს, 2021-ში პუფებივით შემოლაგდნენ. ახლაც პუფების მდგომარეობაში ჩაიგდეს თავი გახარიას პარტიის წარმომადგენლებმა. ახლა ეს უნდა აიტანონ. საერთო ჯამში, ეს მათი ბრალი არც არის, მათ რაც უთხრეს, ის გააკეთეს, მაგრამ მათი ბრალი ისაა, რომ საკუთარი ქვეყნის ინტერესებზე კი არ ფიქრობდნენ, არამედ სხვა ქვეყნის ინტერესებს ატარებდნენ“, - აღნიშნა პაპუაშვილმა.

როგორც მან აღნიშნა, შალვა კერესელიძესთან შეხვედრის დროს, რომელიც პარლამენტში შედგა, მათ ტექნიკურ საკითხებზე ისაუბრეს. მისივე თქმით მათ პარლამენტი სრულად დაეხმარება.

„გახარიას პარტიის წარმომადგენლები საჯაროდ ამბობენ, რომ აპირებენ, გამოიყენონ ეს საპარლამენტო ინსტრუმენტები, ასე რომ, მათ სრული შესაძლებლობა ექნებათ, კუთვნილი საპარლამენტო აქტივებით ისარგებლონ. მათ შორის, ამ მოწვევის პარლამენტში, ჩვენ გვაქვს ახალი რეგლამენტი, რომლის თანახმადაც, ოპოზიციისთვის ბევრი საინტერესო ინსტრუმენტია და შეუძლიათ გამოიყენონ“, - განაცხადა შალვა პაპუაშვილმა.