შალვა პაპუაშვილი: რადიკალური ოპოზიცია ამ პერიოდს ფუჭად კარგავს, ჯერ კიდევ ვერ გაერკვნენ ერთმანეთში, რა უნდათ და როგორ ჩამოყალიბდებიან

„ახლა ამ პერიოდს ფუჭად კარგავს რადიკალური ოპოზიცია, ჯერ კიდევ ვერ გაერკვნენ ერთმანეთში, რა უნდათ და როგორ ჩამოყალიბდებიან“, - ამის შესახებ პარლამენტის თავმჯდომარემ, შალვა პაპუაშვილმა პირველი არხის გადაცემაში „აქტუალური თემა - მაკა ცინცაძესთან ერთად“ სტუმრობისას განაცხადა.

გადაცემის წამყვანმა პაპუაშვილს კითხვა დაუსვა, რას აპირებს ხელისუფლება, რათა არ დადგეს ვიზალიბერალიზაციის შეჩერების, ომში ჩართვისა და ხელისუფლების ცვლილების საკითხი, რაზეც პაპუაშვილმა აღნიშნა, რომ ხელისუფლების გეგმა ყოველთვის არის ერთი რამ - იყოს პირნათელი საზოგადოების წინაშე და იმოქმედოს საქართველოს ეროვნული ინტერესების შესაბამისად.

„ეს ორი პრინციპი არის, რატომაც ვიმარჯვებთ ყოველ ჯერზე ასეთი პერიპეტიების დროს. მეორე მხარეს არის სიყალბე, ღირებულებებზე ყალბი საუბარი, ევროპის დროშას ამოფარებული მოძალადეები და ზიზღის ენის გამავრცელებლები არა მხოლოდ ქართველი რადიკალები, უცხოელი რადიკალებიც.

აქეთ მხარეს არის ჩვენი ქვეყნის ეროვნული ინტერესები და კეთილსინდისიერება ჩვენი საზოგადოების წინაშე. ასე რომ ვუდგებით, ამიტომაც არის, რომ, საბოლოო ჯამში, სიმართლე თავის გზას პოულობს ხოლმე. ჩვენ გამოვდივართ ჩვენი საზოგადოების ინტერესებიდან.

ჩვენი საზოგადოება მიიღებს თავის გადაწყვეტილებას, მათ შორის ამ არჩევნებზე. ახლა ამ პერიოდს ფუჭად კარგავს რადიკალური ოპოზიცია. გაიყო ოთხი ბარიერგადალახული პარტია, ორი იღებს მონაწილეობას, ორი - არა. ჯერ კიდევ ვერ გაერკვნენ ერთმანეთში, რა უნდათ და როგორ ჩამოყალიბდებიან.

სექტემბერში ყველა ნახავს, გარედან ძალები როგორ დააყენებენ მათ ერთად საქართველოს წინააღმდეგ და მიიღებენ ბოლოს პასუხს არჩევნებზე, მერე გაუკვირდებათ, ქართველი ხალხი ხმას რატომ არ აძლევს მათ, რომლებიც ქვეყანას არეულობისკენ ექაჩებიან“, - აცხადებს პარლამენტის თავმჯდომარე.