სპორტის მინისტრი აჭარის ავტონომიურ რესპუბლიკაში არსებულ სპორტულ ინფრასტრუქტურას გაეცნო და მწვრთნელებსა და სპორტსმენებს შეხვდა

საქართველოს სპორტის მინისტრი შალვა გოგოლაძე აჭარის ავტონომიურ რესპუბლიკაში სამუშაო ვიზიტით იმყოფებოდა.

შალვა გოგოლაძე პირველ მოადგილე ირაკლი მეძმარიაშვილთან და აჭარის ავტონომიური რესპუბლიკის განათლებისა და სპორტის მინისტრ მაია ხაჯიშვილთან ერთად ბათუმში, ხელვაჩაურში, ჩაქვში, ქობულეთში, ქედაში, შუახევსა და ხულოში არსებულ სპორტულ ინფრასტრუქტურას გაეცნო, ადგილობრივი თვითმმართველობების წარმომადგენლებს, მუნიციპალიტეტებში დასაქმებულ მწვრთნელებს, სპორტსმენებსა და სპორტული საზოგადოების წარმომადგენლებს შეხვდა.

შალვა გოგოლაძემ სპორტსმენებისგან და მწვრთნელებისგან მოისმინა მათი საჭიროებების შესახებ. შეხვედრებზე იმსჯელეს მუნიციპალიტეტებში სპორტული ინფრასტრუქტურის გაუმჯობესების გზებზე, ახალი ინფრასტრუქტურის შექმნასა და მუნიციპალიტეტების სპორტულ დაწესებულებებში ინვენტარისა და ეკიპირების საჭიროებებზე.

მინისტრმა სპორტული საზოგადოების წარმომადგენლებს საქართველოს მთავრობის პროექტი გააცნო, რომელიც მომავალი ოთხი წლის განმავლობაში მუნიციპალიტეტებში თანამედროვე მულტიფუნქციური კომპლექსები ასაშენებლად 2 მილიარდი ლარის დახარჯვას ითვალისწინებს.

მინისტრის განცხადებით აჭარაში ადგილობრივი სპორტული ორგანიზაციები უახლოეს პერიოდში ყველა საჭირო ინვენტარსა და ეკიპირებას მიიღებენ. აღინიშნა, რომ რეგიონებში სამუშაო ვიზიტები კვლავაც ინტენსიურად გაგრძელდება.

ინფორმაციას სპორტის სამინისტრო ავრცელებს.