თბილისში 20 ივნისს აქცია "შინ ევროპისკენ" გაიმართება - "ამ დღეს, არ უნდა იყოს არცერთი დროშა გარდა საქართველოს და ევროკავშირისა"

პარტია "ლელოს" ერთ-ერთი ლიდერი, მამუკა ხაზარაძე მოუწოდებს პოლიტიკურ პარტიებს, 20 ივნისის დაგეგმილი აქცია არ გამოიყენონ ტრიბუნად და დადგნენ "აქციის რიგით მონაწილეებად ხალხთან ერთად".

"20 ივნისი გარდამტეხი დღე იყო ქვეყნის საზოგადოებრივ ცხოვრებაში.

სწორედ ამ დღეს, კიდევ ერთხელ ხმამაღლა დააფიქსირა ქართველმა ხალხმა, რომ მზად არის თავისუფალი მომავლისთვის, შვილებისთვის, ღირსებისთვის, ქვეყნის სწორი განვითარებისთვის ერთად დადგეს.

დღეს, სწორედ ეს ღირებულებებია კვლავ საფრთხეში.

დღეს, როდესაც "ქართული ოცნება" და ბიძინა ივანიშვილი ქვეყნის ევროპულ გზაზე მთავარ დაბრკოლებად იქცა, კიდევ ერთხელ და უფრო ძლიერად არის ქვეყნისა და ჩვენი შვილების მომავალი დასაცავი.

ამ დღეს, არ უნდა იყოს არცერთი დროშა გარდა საქართველოს და ევროკავშირისა, არ უნდა იყოს არცერთი გზავნილი გარდა ქართველი ხალხის ევროპული არჩევანისა

სწორედ ამიტომ, "ლელო", მისი ლიდერები, წევრები, როგორც ამ ქვეყნის რიგითი მებრძოლები მოგიწოდებთ!

გამოვიდეთ ყველა!" - აღნიშნულია მამუკა ხაზარაძის განცხადებაში.

სავარაუდოდ, 15 ივნისს უნდა გამოქვეყნდეს ევროკომისიის შეფასება, რომლის საფუძველზე 27 ქვეყნის ლიდერი, პასუხს გასცემს საქართველოს, მოლდოვისა და უკრაინის განაცხადებს.

საბოლოოდ, კანდიდატის სტატუსის მინიჭებასთან დაკავშირებით, ევროპული საბჭოს შეხვედრა ბრიუსელში 23-24 ივნისს გაიმართება.

ასევე დაგაინტერესებთ:

📍"მთავარის იუმორისტული პროექტები იხურება და ეს უნიჭიერესი ხალხიც უსამსახუროდ რჩება - ზუსტად ვიცი, ოჯახები, ვალდებულებები, უამრავი მოსაგვარებელი პრობლემა გაყრიათ თავზე"