ტრამპი: დიქტატორი არჩევნების გარეშე - ზელენსკისთვის უმჯობესია, სწრაფად იმოქმედოს, წინააღმდეგ შემთხვევაში, ქვეყანა არ დარჩება

„დაფიქრდით, მოკრძალებულად წარმატებულმა კომიკოსმა, ვოლოდიმირ ზელენსკიმ, ამერიკის შეერთებულ შტატებს 350 მილიარდი დოლარის დახარჯვა სთხოვა, რომ წასულიყო ომში, რომლის მოგებაც შეუძლებელია, რომელიც არასდროს უნდა დაწყებულიყო - ომში, რომელსაც ის აშშ-ისა და „ტრამპის“ გარეშე ვერასოდეს მოაგვარებს“, - ამის შესახებ აშშ-ის პრეზიდენტი დონალდ ტრამპი პლატფორმა Truth Social-ში წერს.

როგორც ტრამპი აღნიშნავს, თავად ზელენსკი აღიარებს, რომ აშშ-ის მიერ გაგზავნილი ფულის ნახევარი „დაიკარგა“. ამასთან, აშშ-ის პრეზიდენტი უკრაინელ კოლეგას „დიქტატორად“ მოიხსენიებს და ზელენსკის მოუწოდებს, სწრაფად იმოქმედოს, წინააღმდეგ შემთხვევაში, ქვეყანა არ დარჩება.

„შეერთებულმა შტატებმა 200 მილიარდი დოლარით მეტი დახარჯა ევროპასთან შედარებით და ევროპის ფული გარანტირებულია მაშინ, როდესაც შეერთებული შტატები სანაცვლოდ ვერაფერს მიიღებს. რატომ არ მოითხოვა მძინარე ჯო ბაიდენმა გათანაბრება, რადგან ეს ომი ბევრად უფრო მნიშვნელოვანია ევროპისთვის, ვიდრე ჩვენთვის - ჩვენ გვაქვს დიდი, ლამაზი ოკეანე, რომელიც გვყოფს.

გარდა ამისა, ზელენსკი აღიარებს, რომ ჩვენ მიერ გაგზავნილი თანხის ნახევარი „დაკარგულია“. ის უარს ამბობს არჩევნებზე, უკრაინულ გამოკითხვებში ძალიან დაბალი პოზიციებს იკავებს და ერთადერთი, რაშიც კარგი იყო, ბაიდენის „ვიოლინოსავით“ თამაში იყო.

დიქტატორი არჩევნების გარეშე, ზელენსკისთვის უმჯობესია, სწრაფად იმოქმედოს, წინააღმდეგ შემთხვევაში, ქვეყანა არ დარჩება.

იმავდროულად, ჩვენ წარმატებით ვაწარმოებთ მოლაპარაკებებს რუსეთთან ომის დასრულების შესახებ, რასაც ყველა აღიარებს, რომ მხოლოდ „ტრამპს“ და ტრამპის ადმინისტრაციას შეუძლია.

ბაიდენს ეს არასოდეს უცდია, ევროპამ მშვიდობის დამყარება ვერ შეძლო და ზელენსკის, ალბათ, სურს გააგრძელოს იოლი გზით ფულის გამომუშავება.

მიყვარს უკრაინა, მაგრამ ზელენსკი საშინლად მოიქცა, მისი ქვეყანა დაიშალა, მილიონობით ადამიანი უმიზეზოდ დაიღუპა და ასე გრძელდება“, - წერს ტრამპი.