ვინ მოკლა გიორგი სანაია - სკანდალური აღიარება

ტელეკომპანია „რუსთავი 2“ ჟურნალისტ გიორგი სანაიას მკვლელობიდან 21 წლის შემდეგ, ყოფილი პატიმარი, კონსტანტინე ციხისთავი იმ პირებს ასახელებს, ვინც მკვლელობა დაუკვეთა.

"ფორმულას"- თან ინტერვიუში, სანაიას მკვლელობის დამკვეთებს შორის ციხისთავი კახეთის პოლიციის ყოფილ უფროსს თამაზ თამაზაშვილსაც ასახელებს.

კონსტანტინე ციხისთავი შოთა ჭიჭიაშვილის ბანდის ყოფილი წევრია.

ინტერვიუს აწ გარდაცვლილი გიორგი სანაიას ძმა, ჟურნალისტი ვახო სანაია უძღვებოდა.

"ვიყავი შოთა ჭიჭიაშვილის დაჯგუფების წევრი, ერთ საღამოს პანკისის ხეობაში შს მინისტრის მოადგილის, კახა ბაკურაძის, კახეთის სამხარეო სამმართველოს უფროსის, თამაზ თამაზაშვილისა და შოთა ჭიჭიაშვილის შეხვედრას შევესწარი.

შეხვედრაზე გიორგი სანაიას მკვლელობა დაიგეგმა, ხელს გვიშლის, არ გაჩერდება, გადამდები საქციელი აქვს, უნდა მოვიშოროთ თავიდან, შენ მიხედავ, - უთხრა თამაზაშვილმა ჭიჭიაშვილს.

ამ შეხვედრას შემთხვევით შეესწრო შოთა ჭიჭიაშვილის ძმის სიდედრი ნაირა მარგოშვილი, რაზედაც თამაზაშვილი გაბრაზდა, ხვალ მთელ პანკისს ეცოდინება ამ შეხვედრის ამბავიო.

ნაირა მარგოშვილი რამდენიმე დღეში გარდაცვლილი ტყეში იპოვეს.

გიორგი სანაია მოკლა შოთა ჭიჭიაშვილმა და არა გრიგოლ ხურცილავამ.

"გრიცკო" იყო ჩვენი ბანდის ინფორმატორი, ის გვაწვდიდა ინფორმაციას გასატაცებელი ობიექტების გადაადგილების შესახებ.

ის იძულებული გახდა, თავის თავზე აეღო გიორგი სანაიას მკვლელობის საქმე", - ეს დეტალები კოტე ციხისთავმა ფორმულასთან ექსკლუზიურ ინტერვიუში განაცხადა.

ჟურნალისტი და გადაცემა „ღამის კურიერის“ წამყვანი, 26 წლის გიორგი სანაია 2001 წლის 26 ივლისს მოკლული საკუთარ ბინაში იპოვეს. გამოძიებამ მკვლელობა საყოფაცხოვრებო ნიადაგზე ჩადენილ დანაშაულად შეაფასა და პასუხისგებაში გრიგოლ ხურცილავა მისცა. 2003 წლის 9 ივლისს, სასამართლომ ბრალდებულს 13 წლით თავისუფლების აღკვეთა მიუსაჯა. ხურცილავას ამნისტია შეეხო და ციხიდან 2013 წელს გათავისუფლდა.

რაც შეეხება შოთა ჭიჭიაშვილს, საქართველოს სამართალდამცავი ორგანოების მიერ, 28 წლის შოთა ჭიჭიაშვილზე ეროვნული მასშტაბით ძებნა 1997 წლიდან იყო გამოცხადებული, 2000 წლიდან კი უკვე ინტერპოლის წითელი ცირკულარით იძებნებოდა. ამ დროისათვის მას უკვე ადამიანების გატაცებებსა და მკვლელობებში ედებოდა ბრალი. გამოძიების მტკიცებით, სწორედ მისი ორგანიზებულია ისეთი ცნობილი და გახმაურებული საქმეები, როგორიცაა: ბრიტანელი ბანკირის პიტერ შოუს, ესპანელი ბიზნესმენების, წითელი ჯვრის საერთაშორისო კომიტეტის წევრებისა და პარლამენტარ პეტრე ცისკარიშვილის გატაცება.

ჭიჭიაშვილი 2003 წელს მოსკოვში დააკავეს და მისი ექსტრადირება საქართველოში მოხდა. 2005 წელს, საქართველოს უზენაესმა სასამართლომ ჭიჭიაშვილი დამნაშავედ ცნო ადამიანების გატაცებაში, მკვლელობასა და ბანდიტიზმში. მათ შორის ყველაზე გახმაურებული, 2000 წელს, გამოსასყიდის მიღების მიზნით, ესპანელი ბიზნესმენების, ფრანცისკო როდრიგესისა და ანტონიო ტრიმილიოს გატაცების ფაქტია.

სასამართლომ ჭიჭიაშვილს 22 წლით თავისუფლების აღკვეთა შეუფარდა, მკაცრი რეჟიმის სასჯელაღსრულების დაწესებულებაში ყოფნით. ჭიჭიაშვილი პატიმრობაში 8 წელი და რამდენიმე თვე იმყოფებოდა. 2013 წელს ის ამნისტიის საფუძველზე და სასჯელის შეკრებითობის პრინციპის გაუქმების შედეგად პატიმრობიდან გაათავისუფლეს.

სხვა სიახლეები:

🔳 "უსამართლობის გრძნობას მხოლოდ ის კი არ იწვევს, ვანოს ცოლის კაპრიზებით ადამიანებს რომ ჩაგრავდნენ, არამედ ირაკლის ცოლისა და დათოს ცოლისთვის რომ დაუმსახურებელი პრივილეგიები არსებობს ესეც" - სოფიო ხორგუანი პრემიერის ცილისთვის ტყის გადაცემაზე

🔳 ხობში ავტოსაგზაო შემთხვევას ერთი ადამიანი ემსხვერპლა

🔳 "უკრაინის არმია უნდა განვითარდეს, მიუხედავად იმისა, შევა თუ არა ეს სახელმწიფო ალიანსში" - ზელენსკი

🔳 რუსთავში, სკოლის ეზოში ცხედარი იპოვეს