ქართველები იტალიაში: „სატელევიზიო მოწოდებიდან ზუსტად 30 წუთში, ხალხის მასამ ტაძართან შეგროვება დაიწყო“

ჰუმანიტარული ტვირთით სავსე ტრაილერები, რეჯო კალაბრიიდან, უკრაინის მიმართულებით უკვე გაემგზავრნენ. რეჯო კალაბრიის მოსახლეობამ, ქალაქში მცხოვრებმა სხვადასხვა დიასპორის წარმომადგენლებმა, ქართველებთან ერთად უკრაინაში 25 ტონამდე ჰუმანიტარული ტვირთი გააგზავნა. 

ასოციაცია, „კულტურული მოძრაობა ქართველები იტალიაში“ დირექტორის ნინა წიკლაურის ინფორმაციით, უკრაინელების მხარდამჭერი აქციის ორგანიზებიდან, როცა მან საზოგადოებას ტელევიზიების მეშვეობით გაერთიანებისკენ მოუწოდა, 30 წუთში ხალხის მასამ ტაძართან შეგროვება დაიწყო. 

- ომის დაწყებისთანავე გაჩნდა იდეა, რომ უკრაინელებისთვის სიტყვიერი სოლიდარობას გამოცხადების და მანიფესტაციების გარდა, ფიზიკური დახმარებაც გაგვეწია. ორშაბათს, საყოველთაო, მშვიდობიან მანიფესტაციებზე მყოფმა, ვისარგებლე შემთხვევით და ტელევიზიების მეშვეობით, ხალხს მოვუწოდე დაგვეწყო ჰუმანიტარული ტვირთის შეგროვება.

სატელევიზიო მოწოდებიდან ზუსტად 30 წუთში, რეჯო კალაბრიის წმინდა პავლეს სახელობის ბერძნულ-მართლმადიდებლურ ტაძარში ხალხმა ამანათების მოტანა დაიწყო. ქალაქში არსებული ყველა დიასპორა ერთი იდეის ქვეშ გაერთიანდა და ამანათების რაოდენობამ რეკორდულ ციფრს გადააჭარბა. ვინაიდან დიდი რაოდენობის ჰუმანიტარული ტვირთი შეგროვდა, ტრანსპორტირების პრობლემის წინაშე აღმოვჩნდით. დღის მანძილზე სხვადასხვა საელჩოებსა და საკონსულოებში ვრეკავდით, მათ შორის უკრაინის საელჩოშიც.

არა იმიტომ, რომ ქართველი ვარ, არამედ, იმიტომ, რომ ობიექტური ვარ და ამაში ჩემი უკრაინელი მეგობრებიც დამეთანხმებიან. საქართველოს კონსულმა ვახტანგ ანდღულაძემ, საელჩოს ჩართულობით მაქსიმალური მხარდაჭერა გამოგვიცხადა. მუდმივად იყო ჩვენთან ხაზზე და ყველა საორგანიზაციო საკითხში დაგვეხმარა. მეამაყება მათი მხარდაჭერით გამოწვეული შედეგი. 

სურსათით, ტანსაცმლით, მედიკამენტებითა და სხვადასხვა საჭირო ნივთებით დატვირთული ერთი ტრაილერი უკვე წავიდა უკრაინაში, მეორე ტრაილერს ამ დღეებში გავგზავნით. ამ დრომდე ჯამში 50 ტონამდე ტვირთი შეგროვდა და კვლავ გრძელდება მისი მიღება.

დიდება უკრაინას, დიდება საქართველოს და მადლობა იტალიას. - განაცხადა, ჩვენთან საუბარში ნინა წიკლაურმა.

ასევე დაგაინტერესებთ:

📌 უნდა ჩააბაროთ თუ არა იტალიური ენის გამოცდა, იტალიის მოქალაქეობის მისაღებად

📌 იტალიამ უკვე 11 323 უკრაინელი დევნილი მიიღო

📌 იტალიურმა მაუწყებელმა RAI-მ რუსეთიდან ჟურნალისტების გაწვევა გადაწყვიტა