"11 თვის ბავშვი მუხლებზე იდგა და გარდაცვლილ დედას ეხვეოდა" - პოლიციელის ჩვენება, რომელმაც კაროლაინის ბავშვი ხელში აიყვანა

ემოციური და ამაღელვებელია პოლიციელის ჩვენება, რომელიც პირველად შევიდა გლიკა ნერაში ძალადობრივი დანაშაულის ადგილზე და ხელში 20 წლის კაროლაინის ბავშვი აიყვანა.

როგორც პოლიციელი, ხრისტოს ვარდიკოსი იხსენებს, განთიადის საათები იყო, როდესაც პოლიციის განყოფილებაში ზარი შევიდა დახმარების თხოვნით. ისინი მაშინვე გამოცხადდნენ შემთხვევის ადგილზე. სახლში შესვლისას მათ მოკლული და ჩამოკიდებული ძაღლი აღმოაჩინეს და მაშინ მიხვდნენ, რომ აქ რაღაც უჩვეულო და გაცილებით სერიოზული დანაშაული იყო მომხდარი. როდესაც სხვენზე ავიდნენ,  შემზარავი სანახაობა დახვდათ, 11 თვის ბავშვი საწოლზე, მუხლებით, იჯდა და გარდაცვლილ დედას ეხვეოდა. 

„ეს არის კადრი, რომელიც არასოდეს დამავიწყდება. რამდენი დროც არ უნდა გავიდეს, ჩემი გულის ნატეხი იმ ოთახში დარჩება. ბავშვს მხოლოდ პამპერსი ეცვა, ხელში ავიყვანე და  პლედი მოვახვიე გასათბობად... ასე მყავდა ჩახუტებული, დაახლოებით ნახევარი საათი, სანამ მისი ბებია, ბაბუა და სხვა ნათესავები არ მოვიდნენ...“, - იხსენებს 40 წლის, პოლიციის თანამშრომელი,  რომელიც თავად 8 წლის შვილის მამაა და ხაზგასმით აღნიშნავს: „როდესაც ბავშვი ამ მდგომარეობაში დავინახე, ემოციურად გავნადგურდი“.  

შეგახსენებთ, რომ 11 მაისს საბერძნეთში , კერძოდ გლიკა ნერაში სასტიკი, ძალადობრივი დანაშაული დაფიქსირდა.

ძარცვის მიზნით ახალგაზრდა წყვილს საკუთარ სახლში შეიარაღებული უცნობი პირები დაესხნენ თავს. მათ სასიკვდილოდ გაიმეტეს ოჯახის დიასახლისი, 20 წლის კეროლაინი, იმ დროს როდესაც იმავე ოთახში, დაბმული და  თვალებახვეული ჰყავდათ მისი 32 წლის მეუღლე. შემთხვევის დროს საძინებელ ოთახში იმყოფებოდა მათი 11 თვის ქალიშვილიც. მძარცველებმა მოკლეს ოჯახის ძაღლიც.

გავრცელებული ინფორმაციით, მძარცველებმა ოჯახიდან ძვირფასეულობასთან ერთად  15000 ევრო გაიტაცეს და  გაუჩინარდნენ.  

მომხდართან დაკავშირებით გამოძიება უწყვეტ რეჟიმში მიმდინარეობს.