ნინო წილოსანი: ფაქტია, საქართველოს არ გადაუხვევია ევროკავშირის კურსიდან. ვინც კურსს გადაუხვია, ეს არის თავად ევროკავშირი და ბრიუსელის ბიუროკრატია, რომელმაც გადაუხვია დასავლეთის კურსს და თავად უღალატა ევროპის იდეას

ფაქტია, საქართველოს არ გადაუხვევია ევროკავშირის კურსიდან, - განაცხადა გადაცემაში „დღის ქრონიკა“ პარლამენტის თავმჯდომარის მოადგილე ნინო წილოსანმა გაფართოების საკითხებში ევროკომისარ, მარტა კოსის განცხადებასთან დაკავშირებით.

ნინო წილოსანის თქმით, ვინც კურსს გადაუხვია, ეს არის თავად ევროკავშირი და ბრიუსელის ბიუროკრატია, რომელმაც გადაუხვია დასავლეთის კურსს და თავად უღალატა ევროპის იდეას.

„ამაზე არა ჩვენ, არამედ თავად ევროკავშირის წევრი სახელმწიფოები, მათი ზოგიერთი ლიდერი და რაც მთავარია, აშშ-ს პრეზიდენტი, მისი ადმინისტრაცია და მისი არაერთი წარმომადგენელი საუბრობს.

ევროკავშირის ბიუროკრატებისთვის, როგორც ჩანს დემოკრატიას წარმოადგენს თუ ხალხის არჩეული ხელისუფლების ნაცვლად ისინი დასვამენ ხელისუფალს. მათთვის დემოკრატია წარმოადგენს, თუ საკუთარი ქვეყნის ინტერესების წინააღმდეგ ომის იარაღად იქნები გამოყენებული. ასეთი არასწორი გაგებები, რა თქმა უნდა, მიგვანიშნებს რომ რაღაც ცდომილებაა თავად ამ ევრობიუროკრატების აზროვნებაში ან მიზნებში. იმას რომ თავი გავანებოთ, თავად ევროკავშირის იდეისთვის არის ეს ყველაფერი დამაზიანებელი, ჩვენ ძალიან კარგად ვიცით ჩვენი ქვეყნისთვის რა არის კარგი.

არაფერს განსაკუთრებულს არ მოველით ამ შეხვედრიდან. ჩვენ კარგად ვხვდებით, რომ ეს პატარა პოლიტიკური ბიუროკრატების ჯგუფი განაწყენებულია ქართველ ხალხზე და ისინი ყველაფერს გააკეთებენ, რომ მათ ხელთ არსებული მექანიზმებით დასაჯონ საქართველო და ქართველი ხალხი“, - აღნიშნა ნინო წილოსანმა.

ევროპული საბჭოს მიერ მიღებული გადაწყვეტილებისთვის პასუხისმგებლობას, საქართველოს ხელისუფლებას აკისრებენ. მარტა კოსის თქმით, იმისთვის, რომ ქვეყანამ ევროკავშირში გაწევრების პროცესი განაგრძოს, საქართველოს მთავრობამ მიდგომები და დღის წესრიგი უნდა შეცვალოს. მმართველი გუნდის შეფასებით, სახეზეა ევრობიუროკრატების არათანმიმდევრული განცხადებები. სწორედ მარტა კოსის აქვს რამდენიმე კვირის წინ ნათქვამი, რომ პროცესი ევროპულმა საბჭომ შეაჩერა და არა საქართველოს ხელისუფლებამ.