საბერძნეთში 47 წლის ქართველი სამუშაო ადგილზე მომხდარ უბედურ შემთხვევას ემსხვერპლა

47 წლის ქართველი კაცი, რომელიც საბერძნეთში სათბურის მშენებლობაზე მუშაობდა, დენის დარტყმის შედეგად მიყენებული დამწვრობით გარდაიცვალა.

ბერძნული მედიის ინფორმაციით, კაცს დენმა იმ დროს დაარტყა, როცა ის რკინის მილის გადაადგილებას ცდილობდა, რომელიც შემთხვევით მაღალი ძაბვის სადენს შეეხო. ძლიერი დამწვრობის შემდეგ, უგონო მდგომარეობაში მყოფი დაშავებული საავადმყოფოში გადაიყვანეს. აღმოჩნდა, რომ ძლიერი ელექტროშოკისგან მას სხეულის უმეტეს ნაწილზე ძლიერი დამწვრობები ჰქონდა.

ადგილობრივი მედიის ინფორმაციით, გარდაცვლილი ქართველი მუშაობდა ტექნიკურ კომპანიაში, რომელიც, გუშინ, დილის 9.30 საათიდან შეუდგა სათბურის მშენებლობას.

ავარია მაშინ მოხდა, როდესაც ის ლითონის კონსტრუქციის ზედა ნაწილში, 5 მეტრის სიმაღლეზე იდგა და ხელში ეჭირა მილი, რომელიც მაღალი ძაბვის სადენს შეეხო.სხვა თანამშრომლების ინფორმაციით, გარდაცვლილს ეკეთა ხელთათმანი, რომელიც შესაძლოა, არ იყო ელექტროიზოლირებული.

ინციდენტისთანავე იქნა გამოძახებული სასწრაფო დახმარების ბრიგადა, რომელმაც ის ჯერ ჯანმრთელობის ცენტრში გადაიყვანა, შემდეგ კი საავადმყოფოში, სადაც მას ინტუბაცია გაუკეთეს, თუმცა დამწვრობის ხარისხისა და მასშტაბების გამო, მისი გადარჩენა ვერ მოხერხდა.

ბერძნული მედიის ინფორმაციით, დაკრძალვის ხარჯებს, დამსაქმებელი კომპანია აიღებს, რადგან 47 წლის გარდაცვლილს, ნათესავები არ ჰყავდა. 

ასევე დაგაინტერესებთ:

🔵33 წლის მეზობელი ბიჭის მკვლელობაში ბრალდებული 77 წლის ქალი, სასამართლომ პატიმრობაში დატოვა

🔵როგორი ამინდები იქნება 1 აგვისტომდე საქართველოში?

🔵ქუთაისის აეროპორტის რეაბილიტაციის გამო Wizz Air ოქტომბერში თბილისის აეროპორტიდან იფრენს