საბერძნეთში, პაციენტმა საავადმყოფოს კოვიდ კლინიკაში ხანძარი გააჩინა - დაიღუპა ერთი და დაშავდა 5 ადამიანი

საბერძნეთში, თესალონიკის პაპანიკოლაუს საავადმყოფოს კოვიდ განყოფილებაში დღეს დილით ხანძარი გაჩნდა, რომლის შედეგადაც ერთი ადამიანი დაიღუპა და ხუთი დაშავდა. სახანძრო ბრიგადის საგამოძიებო განყოფილება, ხანძრის გამომწვევ მიზეზებს იკვლევს.   

დაშავებულთაგან 4 პაციენტს მიღებული აქვთ სხეულის დამწვრობები, ერთი კი ხელოვნური სუნთქვის აპარატზეა მიერთებული.

კოვიდ კლინიკის დირექტორის განცხადებით, საავადმყოფოში ხანძარი, კორონავირუსით ინფიცირებულმა ერთ-ერთმა პაციენტმა გააჩინა. მისი განცხადების თანახმად, პაციენტის ეს ქმედება შეუმჩნეველი დარჩა, რამაც სამ სართულიან შენობაში, სადაც 20 კორონავირუსით დაავადებული მძიმე პაციენტი მკურნალობს, ხანძრის სწრაფი გავრცელება გამოიწვია. 

Thestival-ის  ინფორმაციით, კორონავირუსით ინფიცირებულმა პაციენტმა, რომელიც ჟანგბადის ნიღბით სარგებლობდა, სიგარეტს მოუკიდა რამაც სწრაფად აალებადი ცეცხლის გაჩენა გამოიწვია. 

სახანძრო ბრიგადამ, საავადმყოფოდან პაციენტებისა და სამედიცინო პერსონალის უსაფრთხო ევაკუაცია უზრუნველყო. 

როგორც ცნობილია ხანძარი კოვიდ განყოფილების იმ პალატაში გაჩნდა, სადაც 3 პაციენტი მკურნალობდა, რომელთაგან ერთ-ერთი დამწვარი იპოვეს.  

სახანძრო ბრიგადის კოორდინირებული მოქმედებების შედეგად და საავადმყოფოს პერსონალის დახმარებით, შენობის ორი სართულიდან სულ 38-მდე ადამიანი გამოიყვანეს.

ასევე საინტერესოა 

🔷საბერძნეთის ხელისუფლება კიბოთი დაავადებული უკრაინელი ბავშვების კლინიკაში გადაყვანას და მკურნალობას უზრუნველჰყოფს

🔷"ჩვენ ვთქვით და ჩვენ ეს გავაკეთეთ!"- საბერძნეთის მთავრობა, საერთაშორისო სავალუტო ფონდის კრედიტს ვადაზე ადრე აანაზღაურებს

🔷9 წლის შვილის მკვლელობის ბრალდებით დაკავებული დედა კორინდალოს ციხეში გადაიყვანეს - წაყენებულ ბრალდებას ის სამარცხვინოს და არარეალურს უწოდებს