ილიას "მგზავრის წერილები" იტალიურ ენაზე გამოიცა

ილია ჭავჭავაძის „მგზავრის წერილებს“ უკვე იტალიელი მკითხველიც წაიკითხავს. იგი იტალიურ ენაზე მანანა ტოფაძე გოიმანმა თარგმნა. გამოცემა ორენოვანი, ქართულ-იტალიურია, რაც ძალიან მისასალმებელია.

საქართველოს მწერალთა სახლის მხარდაჭერით, წიგნი იტალიურმა გამომცემლობა Edizioni Il Saggio-მ გამოსცა. წინასიტყვაობის ავტორი ივანე ამირხანაშვილია, ხოლო გარეკანს, ბადრი ვადაჭკორიას გერგეტის სამების ფოტო ამშვენებს.

როგორც ჩვენთან აღნიშნული წიგნის მთარგმნელი, ქალბატონი მანანა ტოფაძე გოიმანი ინტერვიუში ამბობს, ნაწარმოების იტალიურ თარგმანზე მუშაობა უაღრესად სასიამოვნო იყო. ქალბატონი მანანა, ენათმეცნიერი, გერმანული და იტალიური ენების სპეციალისტი გახლავთ. ამჟამად, შვეიცარიის ქ. ბერნის უნივერსიტეტში მუშაობს, სადაც ქართული ენის კურსს უძღვება. ქართულ ენას ასწავლის ასევე ბერნის ქართულ საკვირაო სკოლაში.

მანანა ტოფაძე გოიმანი: ილია ჭავჭავაძის "მგზავრის წერილები" მთარგმნელის და გამომცემლის ერთობლივი ინიციატივითა და საქართველოს მწერალთა სახლის მხარდაჭერით გამოიცა.

- რა პრინციპით შეირჩა სწორედ ეს ნაწარმოები და რა დრო მოანდომეთ თარგმანზე მუშაობას?

- გასულ წლებში, არაერთი თანამედროვე ქართველი მწერალი ითარგმნა იტალიურად, რამაც ხელი შეუწყო იტალიელი მკითხველის ინტერესის გაღვივებას ქართული ლიტერატურის მიმართ. აქედან გამომდინარე, გადავწყვიტეთ, დაინტერესებული მკითხველისათვის ქართული კლასიკური მწერლობის ნიმუში შეგვეთავაზებინა, ქართულ და იტალიურ ენებზე. „მგზავრის წერილების“ თარგმნა ჯერ კიდევ სტუდენტობისას განვიზრახე, რადგან ჩემი ერთ-ერთი უსაყვარლესი ნაწარმოებია. გარდა ამისა, ნაწარმოებში წამოჭრილი საკითხები დღესაც ისეთივე აქტუალურია, როგორც ილიას ეპოქაში.

- სად შეიძლება წიგნის შეძენა და ხომ არ გეგმავთ მის პრეზენტაციას იტალიაში?

- წიგნის შეძენა შესაძლებელია როგორც გამომცემლობის ვებგვერდზე, ასევე წიგნის მაღაზიებშიც. იგეგმება მისი პრეზენტაცია იტალიაში.

ესაუბრა ნინა მამუკაძე