10 წლის წინ უგზო-უკვლოდ გამქრალი გოგონას საქმეს ფარდა აეხადა?!

იტალიაში, კერძოდ კი აჩირეალეში, პოლიციამ 10 წლის წინ ჩადენილი მკვლელობის ბრალდებით, 60 წლის მამაკაცი დააკავა, რომელსაც კატანიის სასამართლომ, აღკვეთის ღონისძიების სახით, პატიმრობა შეუფარდა.

პოლიციამ საქმე ქუჩის ტელეკამერების მორიგი კონტროლის შემდეგ განაახლა, როდესაც ჩანაწერები ერთ-ერთი მოწმისა და ეჭვმიტანილის ჩვენებას არ დაემთხვა. 

ბრალდების მუხლიდან ვიგებთ, რომ მამაკაცს მკვლელობასა და გვამის გადამალვაში ედება ბრალი. ბრალდებულს სამხილების დამახინჯებასა და ყალბი ალიბის შექმნაშიც ედავებიან.

საქმე ეხება 2012 წლის ივნისში, საკუთარი სახლიდან გამქრალ აგატა სკუტოს, რომელიც იმ დროისთვის სულ რაღაც 22 წლის იყო. 

გოგონა, რომელსაც ფსიქოლოგიური და ფიზიკური პრობლემები ჰქონდა და გარეთ მარტო არასდროს გადიოდა, საკუთარი სახლიდან უგზო-უკვლოდ დაიკარგა. 

გოგონას მამინაცვალზე, რამდენიმე წლის წინ გაჩნდა ეჭვი. როდესაც გოგონას დედამ ძებნის გამოცხადების თაობაზე პოლიციაში განცხადება შეიტანა, მამინაცვალმა ჩვენება მისცა, რომ მან აგატა, გაქრობის დღეს, მოტოციკლზე ქერა ახალგაზრდა მამაკაცთან ერთად დაინახა.

ამ ჩვენების საფუძველზე ოჯახმა იფიქრა, რომ გოგონა საკუთარი სურვილით წავიდა სახლიდან და პოლიციიდან განცხადება გამოიტანა, მაგრამ გარკვეული დროის შემდეგ გოგონას დედას ეჭვი გაუმძაფრდა, რომ მისი შვილის საქმეში, საკუთარი მეუღლის ხელი ერია. ქალის აზრით, მამაკაცმა გოგონასთან ინტიმური ურთიერთობა დაამყარა, რის შედეგადაც აგატა ორსულად დარჩა და მამინაცვალმა ის ფაქტების დამალვის მიზნით მოკლა, ხოლო გვამი გადამალა.