იტალიის პოლიცია, უკრაინის დახმარების მოტივით გახშირებული თაღლითობების გამო, მოსახლეობას სიფრთხილისკენ მოუწოდებს

ბოლო დროს, იტალიურ ინტერნეტსივრცეში შეიმჩნევა სამწუხარო ტენდენცია. იკვეთება თაღლითობის სქემები, რომელთა საშუალებითაც, კონკრეტული პირები, დღესდღეობით ყველაზე სენსიტიური, უკრაინის ომის თემით, სარგებლის მიღებას ცდილობენ.

საქმეში სამართალდამცველებიც ჩაერთვნენ. იტალიის პოლიცია, უკრაინის დახმარების მოტივით გახშირებული თაღლითობების გამო, მოსახლეობას სიფრთხილისკენ მოუწოდებს. ერთ-ერთი მათგანია WhatsApp-ით გავრცელებული მესიჯები. პოლიცია კონკრეტულ რჩევებს იძლევა. გაითვალისწინეთ, რომ:

• საქველმოქმედო მიზნებისთვის ფულადი სახსრების შეგროვება, როგორც წესი, შეთანხმებულია იმ ოფიციალურ ორგანოსთან, რომლისთვისაც არის თანხა განკუთვნილი და ინფორმაცია, ამ ორგანოს მიერ ოფიციალურ ვებგვერდებზე ვრცელდება. 
• არ არის გამორიცხული, რომ კერძო პირს, ან ორგანიზაციას მართლაც კეთილი ზრახვები ამოძრავებდეს და შეგროვებულმა თანხამ, რეალურად მიაღწიოს მითითებულ მიმღებს, მაგრამ მნიშვნელოვანია, რომ შემოწირულების გაღებამდე შეამოწმოთ, მითითებული საბანკო მონაცემები არის თუ არა მიმღების ოფიციალურ ვებგვერდზე. ნუ მიუთითებთ საკრედიტო ბარათის მონაცემებს, ისარგებლეთ ერთჯერადი გადახდის ფუნქციით.
• ეჭვის შემთხვევაში, დაუკავშირდით საფოსტო და კავშირგაბმულობის პოლიციას. საკონტაქტო მონაცემები, თქვენი საცხოვრებლის მიხედვით, შეგიძლიათ იხილოთ ინტერნეტში, ან მათ ოფიციალურ ვებსაიტზე www.commissariatodips.it.