საჩუქარი ემიგრანტ ბავშვებს, რომლებიც ინტეგრირებულ სწავლებას საკვირაო სკოლა „იმედში“ გადიან

იტალიის ქალაქ ბარიში არსებულ საკვირაო სკოლა ,,იმედი" - ს აღსაზრდელებმა და პედაგოგებმა, საქართველოს საგარეო საქმეთა სამინისტროს და საკონსულოს წარმომადგენლებს უმასპინძლეს. 

იტალიაში ოფიციალური ვიზიტით მყოფმა, საგარეო საქმეთა სამინისტროს დიასპორასთან ურთიერთობის დეპარტამენტის, თანამემამულეებთან და დიასპორულ ორგანიზაციებთან ურთიერთობის სამმართველოს მრჩეველმა, ირმა კაველიძემ, „იმედელებს“ სამახსოვრო საჩუქრები გადასცა. მათ შორის, საოჯახო ბიბლიოთეკიდან, სპეციალურად ხსენებული ვიზიტის ფარგლებში, მოსწავლეებს საბავშვო ენციკლოპედია უსახსოვრა, რომელიც მის შვილს ეკუთვნოდა.

შეხვედრას, ასევე ესწრებოდა ქალაქ ბარიში არსებული გენერალური საკონსულოს ვიცე კონსული, ხატია ჭელიძე. 

შეგახსენებთ, რომ საკვირაო სკოლაში, სხვადასხვა ასაკის მქონე 50-მდე აღსაზრდელი გადის ინტეგრირებულ სასწავლო პროცესს.  

როგორც ჩვენთან საუბარში, საკვირაო სკოლის დამაარსებელმა, ცინარი ღვალაძემ აღნიშნა, სტუმრები სასწავლო პროცესის მიმდინარეობას ადგილზე გაეცნენ, მოუსმინეს და გაესაუბრნენ სკოლის მოსწავლეებს. 

საკვირაო სკოლის მოსწავლეებმა, სტუმრების პატივსაცემად და ეროვნული თვითმყოფადობის შენარჩუნების დასტურად, საქართველოს ჰიმნი შეასრულეს და ლექსები წაიკითხეს. 

„ასე გაახარეს მოსწავლეები და გაახალისეს, ჩვენი საკვირაო სკოლის ერთი დღე. შეხვედრამ თბილ და მეგობრულ გარემოში ჩაიარა, რაც გვიტოვებს სურვილს, კიდევ ერთხელ გამოვხატოთ მადლიერება, ჩვენი ქვეყნის ოფიციალური წარმომადგენლების და ყველა იმ პირის მიმართ, ვისთვისაც ძვირფასია საქართველოს ფარგლებს გარეთ მყოფი პატარა თანამემამულეების სწავლა-განათლება“ -  აღნიშნა საკვირაო სკოლის დამაარსებელმა ცინარი ღვალაძემ.

აგრეთვე დაგაინტერესებთ:

📌 50 ქართველი მოსწავლე, იტალიის ქალაქ ბარიში ქართულ წერა-კითხვას სწავლობს

📌 როგორ დავუკავშირდეთ, ქალაქ ბარიში არსებულ, საქართველოს გენერალურ საკონსულოს

📌 კონკურსი იტალიაში მცხოვრები ახალგაზრდა თაობის წარმომადგენლებისათვის, რომელსაც ქალაქ ბარიში არსებული გენერალური საკონსულო აცხადებს