ილონ მასკი ადამიანებზე ტვინის იმპლანტის გამოცდას დაიწყებს?!

2022 წლიდან, ილონ მასკი ადამიანებზე ტვინის იმპლანტის გამოცდას დაიწყებს.
კომპანია Neuralink-ის თანადამფუძნებელმა ილონ მასკმა განაცხადა, რომ  2022 წლიდან მიკროჩიპს, ანუ ტვინის იმპლანტს, ადამიანებზე გამოცდიან.

Neuralink-ი 2016 წლის ივლისში დაარსდა.  კომპანია  დაკავებულია იმპლანტირებადი ჩიპის შექმნით, რომელიც ადამიანის ტვინს საშუალებას მისცემს უშუალოდ, ყოველგვარი დამხმარე საშუალებების გარეშე დაუკავშირდეს კომპიუტერებს.  

მიკროჩიპის გამოცდა აქამდე მაიმუნებზე მიმდინარეობდა. როგორც ჩანს, კომპანიამ პროგრესს მიაღწია, რადგან მისი თანადამფუძნებელი ილონ მასკი, საკმაოდ ოპტიმისტურად არის განწყობილი და ფიქრობს, რომ იმპლანტის გამოცდას მალე ადამიანებზეც დაიწყებს. Neuralink-ი კარგად მუშაობს მაიმუნებზე. ჩვენ ვატარებთ უამრავ ტესტირებას და ვადასტურებთ, რომ ის ძალიან უსაფრთხო და საიმედო მოწყობილობაა“- განაცხადა ილონ მასკმა.

მასკი არ გამორიცხავს, რომ მოწყობილობა შეიძლება გადაიზარდოს ტვინის სრულ ინტერფეისად სულ რაღაც 25 წელიწადში.  ნეირონული ინტერფეისის ჩამონტაჟება ადამიანის თავის ქალაში რობოტების მეშვეობით მოხდება. ჩიპის დანერგვის  შემთხვევაში ხერხემლის მძიმე დაზიანებების მქონე ადამიანები მიიღებენ ტექნოლოგიას, რომელიც მათი კიდურების მოძრაობას სრულად, ან ნაწილობრივ აღადგენს.  მოწყობილობით შესაძლებელი იქნება ალცჰაიმერის განკურნება, მხედველობის და სმენის აღდგენაც კი. იმპლანტის გამოცდის საშუალება კომპანიას აშშ-ს  სურსათისა და წამლების ადმინისტრაციის ნებართვის შემდეგ მიეცემა.

კომპანია ამტკიცებს, რომ  მათი სტანდარტები აღემატება FDA-ის (აშშ-ს  სურსათისა და წამლების ადმინისტრაციის) მოთხოვნებს და იმედოვნებენ, რომ 2022 წლიდან მიკროჩიპის გამოცდა ადამიანებზეც დაიწყება.

ელენე ფერაძე