"თუ იმუნიზაციის მაჩვენებელი ვერ ავწიეთ, სულ გვექნება ვირუსის ორთვიანი ციკლები" - ამირან გამყრელიძე ეპიდვითარებაზე

საკოორდინაციო საბჭოზე ვაქცინაციის ყოველმხრივ გააქტიურებაზე მიმდინარეობს მსჯელობა. ვაქცინის სავალდოებულება საკმაოდ რთული გადაწყვეტილებაა, მაგრამ როგორც ერთი ექიმი, ამირან გამყრელიძე, ამას ვემხრობი -  ამის შესახებ დაავადებათა კონტროლის ცენტრის ხელმძღვანელმა, ამირან გამყრელიძემ საკოორდინაციო საბჭოს სხდომის შემდეგ გამართულ ბრიფინგზე განაცხადა.

"თუ იმუნიზაციის მაჩვენებელი ვერ ავწიეთ, სულ გვექნება ვირუსის ორთვიანი ციკლები. ეპიდვითარების გაუმჯობესება პირდაპირ კავშირშია, ვაქცინაციის გაზრდასთან. თუ ჩვენ მოვახერხებთ მოსახლეობის 60%-ის აცრას, დავასტაბილიზირებთ ეპიდვითარებას, მათ შორის სიკვდილიანობას. ასეთ შემთხვევაში ჩვენ მოგვიწევს თანაცხოვრება კოვიდ ინფექციასთან, რომელიც ლეტალურ გამოსავალს აღარ მოგვიტანს, ან მოგვიტანს მინიმალური რაოდენობით", - განაცხადა ამირან გამყრელიძემ.

მისი თქმით, ლუგარის ლაბორატორიაში ამ დრომდე კორონავირუსის შტამებთან დაკავშირებული ატიპიური მუტაცია არ გამოვლენილა.

"ყოველდღიურად მაქვს ინფორმაცია ლუგარის ლაბორატორიიდან, ხომ არ გამოვლინდა, რომელიმე ატიპიური მუტაცია, რომელიც კავშირშია კორონავირუსის ახალ შტამებთან. ჯერჯერობით ასეთი ფაქტი არ დაფიქსირებულა", - აღნიშნა გამყრელიძემ.

ამავე თემაზე:

🔵 საქართველოში კორონავირუსის 4 762 ახალი შემთხვევა გამოვლინდა, გამოჯანმრთელდა 3 953 პაციენტი

🔵 საგამოძიებო სამსახურმა ყალბი კოვიდპასპორტების დამზადება/გამოყენების ფაქტები გამოავლინა - პასუხისგებაში 9 პირი მისცეს