"ამ პასუხმა შეურაცხყო მთლიანად ქართველი ამომრჩეველი" - დიმიტრი ხუნდაძე, კელი დეგნანის მიხეილ ყაველაშვილისადმი ღია წერილის საპასუხო განცხადებაზე

"მე ველოდი პასუხებს და მივიღე ხალხისგან არჩეული დეპუტატის შეურაცხყოფა. უფრო მეტიც, ეს არ იყო მხოლოდ ერთი დეპუტატის მიმართ გამოხატული უპატივისმცემლობა, ამ პასუხმა შეურაცხყო მთლიანად ქართველი ამომრჩეველი", - ასე ეხმაურება "ქართული ოცნების" ყოფილი დეპუტატი დიმიტრი ხუნდაძე, კელი დეგნანის პასუხს მიხეილ ყაველაშვილი ღია წერილზე.

"არა მგონია, დემოკრატიის პრინციპებში სადმე ამას ვკითხულობდეთ და ეს იყოს დასავლური სტანდარტი, როცა უმაღლესი დონის დიპლომატი დეპუტატის მიერ გაგზავნილ წერილს არც კი კითხულობს და ამას საჯაროდ აჟღერებს.

მე უკვე განვაცხადე, რომ ასეთი დამოკიდებულებით ქართველ ხალხში ევროატლანტიკური გზისკენ ლტოლვა ზიანდება.

ეს კი საფრთხის შემცველია ჩვენი სახელმწიფოსთვის.

დეპუტატის მიერ გაგზავნილი კითხვები იყო ლეგიტიმური და რეალური.

ეს კითხვები აწუხებს დღეს საზოგადოების უდიდეს ნაწილს.

ამ კითხვებს გვისვამენ პოლიტიკოსებს და ჩვენ გვჭირდება პასუხები იმისათვის, რომ ხალხს ვესაუბროთ.

როდესაც პასუხებს თავს არიდებთ ან ზოგადად, როდესაც პასუხები არ გაქვთ, გადადიხართ შეურაცხყოფაზე.

და თუკი ეს დუმილი ან იგნორირება, მით უმეტეს შეურაცხყოფა დიპლომატისგან ხდება, მაშინ იმიჯი უზიანდება იმ ქვეყანას, რომელსაც ის წარმოადგენს", - განაცხადა ხუნდაძემ.

ცნობისთვის, "ქართული ოცნებიდან“ წასულმა დეპუტატმა მიხეილ ყაველაშვილმა საქართველოში ამერიკის შეერთებული შტატების ელჩს, კელი დეგნანს ღია წერილით მიმართა.

როგორც ყაველაშვილი აცხადებს, ვერავითარი "რუსული რბილი ძალა" ვერ შეარყევს საქართველოში ამერიკის რეპუტაციას ისე, როგორც დეგნანის დუმილი, რომელიც ხალხმა ხელისუფლებაში "ნაციონალური მოძრაობის“ დაბრუნების მცდელობად შეიძლება აღიქვას".

ამავე თემაზე:

* "სიმართლე გითხრათ, ბოლომდე ვერ წავიკითხე" - კელი დეგნანი მიხეილ ყაველაშვილის ღია წერილს ეხმაურება

* "ვერავითარი "რუსული რბილის ძალა" ვერ შეარყევს საქართველოში ამერიკის რეპუტაციას ისე, როგორც თქვენი დუმილი, რომელიც ხალხმა ხელისუფლებაში "ნაციონალური მოძრაობის" დაბრუნების მცდელობად შეიძლება აღიქვას" - ყაველაშვილის ღია წერილი კელი დეგნანს

* "კრიტიკა არ სცილდება ეთიკის ფარგლებს" - ირაკლი კობახიძე ყაველაშვილი-დეგნანის განცხადებებზე