დიმიტრი ხუნდაძე: მსოფლიო მესამე მსოფლიო ომის ზღვარზე იმყოფება. ვითარება საკმაოდ დაძაბულია და ამ დაძაბულობის ეპიცენტრად ჩვენი რეგიონის ორი ლოკაცია იქცა, ამიტომ მეტი სიფრთხილე, გონიერება და წინდახედულობა გვმართებს

მსოფლიო მესამე მსოფლიო ომის ზღვარზე იმყოფება. ვითარება საკმაოდ დაძაბულია და ამ დაძაბულობის ეპიცენტრად ჩვენი რეგიონის ორი ლოკაცია იქცა. ამიტომ მეტი სიფრთხილე, გონიერება და წინდახედულობა გვმართებს, - განაცხადა გადაცემაში „იმედი LIVE“ საპარლამენტო პოლიტიკური ჯგუფის - „ხალხის ძალის“ თავმჯდომარემ, დიმიტრი ხუნდაძემ.

„ვფიქრობ, რომ შევძლებთ, როგორც აქამდე ავიცილეთ რისკები, მომავალშიც შევინარჩუნოთ მშვიდობიანი ცხოვრება. საქართველოს დიდი ხანია არ ჰპატიობენ იმას, რომ ის წარმოადგენს მშვიდობის კუნძულს; რომ ის ერთმნიშვნელოვნად არ ემორჩილება გარე დაკვეთებს; რომ არ შეასრულა ომში ჩართვის მითითება რუსეთ-უკრაინის დაპირისპირებაში და არ გახდა სრულად დამოკიდებული სხვისი გადაწყვეტილებების შესრულებაზე.

მთავარ პოლიტიკურ ასპარეზზე, სადაც აქციებისა და დემონსტრაციების ისტორია კარგად გვახსოვს, ყოველთვის დამოუკიდებლობის მოთხოვნა დომინირებდა. დღეს ვუყურებ, რომ ერთი მცირე ჯგუფი მუდმივად მოითხოვს დამოკიდებულებას. ეს მიუღებელია, რადგან შესაძლოა ამგვარი ბრმად სიარულით ძალიან ცუდ გზაზე აღმოვჩნდეთ, როგორც ქვეყანა, ისე საზოგადოება. სამწუხაროა, როცა ელჩები წარმოდგენილნი არიან როგორც „დიფ სთეიტის“ აქტივისტები. ჩვენ არაერთხელ გვინახავს მათი ქმედებები, რომლებიც ეწინააღმდეგება როგორც მათი ქვეყნების ინტერესებს, ისე დიპლომატიურ სტანდარტებს. ელჩების ჩარევა შიდა სახელმწიფო საქმეებში, რასაც ვენეციის კონვენცია კრძალავს, ძალიან ხშირად ხდება ჩვენს რეალობაში,“ - აღნიშნა დიმიტრი ხუნდაძემ.