არქიმანდრიტი იოვანე მჭედლიშვილი: ვნების შვიდეულის პარასკევი, უმძიმესი დღეა კაცობრიობის ისტორიაში. სახარებაში ვკითხულობთ, თუ რამხელა ტკივილი მივაყენეთ ადამიანებმა ღმერთს, მაგრამ უფალმა უდიდესი სიყვარული გამოავლინა ჯვრიდანაც

ვნების შვიდეულის პარასკევი, რომელსაც წითელ პარასკევს ვუწოდებთ, უმძიმესი დღეა კაცობრიობის ისტორიაში. უფალი ღმერთი ადამიანის სიყვარულით ჯვარზე გაეკრა ამ დღეს, ჩვენი გადარჩენისთვის საკუთარი თავი გაწირა, - განაცხადა სამების საკათედრო ტაძრის მღვდელმსახურმა, არქიმანდრიტმა იოვანე მჭედლიშვილმა.

მან ამ დღესთან დაკავშირებით გაიხსენა სახარებიდან ამონარიდები და აღნიშნა, რომ ნებისმიერი ადამიანი შეძლებს ღმერთთან მისვლას, თუკი ცოდვებს მოინანიებს.

„სახარებაში ვკითხულობთ თუ რამხელა განცდა ჰქონდა უფალს, რამხელა ტკივილი მივაყენეთ ადამიანებმა ღმერთს, მაგრამ უფალმა უდიდესი სიყვარული გამოავლინა ჯვრიდანაც, როდესაც მამა ღმერთს ევედრება: შეუნდე, არ იციან ადამიანებმა რას აკეთებენ. ეს ძალიან დიდი სიყვარულის გამოხატულებაა. ვიცით, მაცხოვართან ერთად ორი ავაზაკი იყო ჯვარცმული. ერთი ლანძღავდა, მეორემ კი სთხოვა, რომ მოეხსენებინა ცათა სასუფეველში და უფალმა უთხრა, რომ დღესვე მასთან ერთად იქნებოდა სასუფეველში. ესეც ნუგეშია და იმედია ადამიანებისთვის, რომ თუკი მოინანიებენ, აუცილებლად შეძლებენ უფალთან ყოფნას“, - აღნიშნა არქიმანდრიტმა.

დღეს წითელი პარასკევია - ვნების კვირეულის ყველაზე მძიმე დღე. მართლმადიდებელი ეკლესია იესო ქრისტეს ჯვარცმას, ჯვრიდან გარდამოხსნასა და დაკრძალვას იხსენებს. ამ წუთებში სამების ტაძარში დიდი პარასკევის სერობა იწყება. მწუხრის ჟამს და გარდამოხსნის წესს საპატრიარქო ტახტის მოსაყდრე, მიტროპოლიტი შიო აღასრულებს.