ბექა დავითულიანი: მმართველი გუნდის მიმართ მხარდაჭერა არის მნიშვნელოვნად გაზრდილი წინა არჩევნებთან შედარებით. ცალსახაა, რომ პრაქტიკულად უალტერნატივოა ჩვენი გუნდის გამარჯვება, მაგრამ მოსახლეობას აქვს თავისი კონკრეტული პრობლემები

მმართველი გუნდის მიმართ მხარდაჭერა არის მნიშვნელოვნად გაზრდილი წინა არჩევნებთან შედარებით. ცალსახაა, რომ პრაქტიკულად უალტერნატივოა ჩვენი გუნდის გამარჯვება, მაგრამ მოსახლეობას აქვს თავისი კონკრეტული პრობლემები, - განაცხადა გადაცემაში „იმედი LIVE“ თბილისის საკრებულოს წევრობის კანდიდატმა ბექა დავითულიანმა.

„პრობლემები, რომელიც დარჩა მოსაგვარებელი ჩვენი ხელისუფლების პირობებშიც, მაგრამ ამ პრობლემების მოგვარებას ჩვენს გარდა ამ ხალხს არავინ ჰპირდება. ზოგი ჰპირდება დამხობას, ზოგი მეორე ადგილს, არავინ არ ჰპირდება გამარჯვებას და პრობლემების მოგვარებას.

წარმოვიდგინოთ ოპოზიციონერი მერი, რომელიც ცუდ ურთიერთობაშია ცენტრალურ ხელისუფლებასთან, წარმოვიდგინოთ პრობლემები ბიუჯეტური, წარმოვიდგინოთ ქალაქის მერიაში კოალიციური ხელისუფლების პრობლემები. ადგილობრივი თვითმმართველობა პოლიტიკას ხომ არ ქმნის არსებითად. ადგილობრივი თვითმმართველობა აწყობს ინფრასტრუქტურას, ცდილობს კომფორტი შეუქმნას თავის მოსახლეობას და სოციალური შეჭირვება შეუმსუბუქოს. ამ ყველაფრის ფონზე კოალიციური ხელისუფლება ქალაქს პრობლემის მეტს ვერაფერს მოუტანს, რომელიც ისედაც არ გვაკლია“, - აღნიშნა ბექა დავითულიანმა.