დავით მათიკაშვილი ჯეფრი საქსზე: ცდილობს, სწორად შეაფასოს და სწორი პასუხები გასცეს იმ პრობლემებს, რაც ჩვენს ქვეყანაშია

 პარლამენტის საპროცედურო საკითხთა და წესების კომიტეტის თავმჯდომარე, დავით მათიკაშვილი აცხადებს, რომ საქართველოში დასავლური განწყობის შერყევა თუ რამეს შეუძლია, ეს ევროკავშირის კონკრეტული ჩინოვნიკების უპასუხისმგებლო და მტრული ქცევებია.

მათიკაშვილის თქმით, ანალიტიკოს ჯეფრი საქსის განცხადებები საქართველოსთან მიმართებით ადეკვატური და სწორია, რადგან, ის ცდილობს სწორად შეაფასოს ის პრობლემები, რომელიც ქვეყანაშია.

„ჯეფრი საქსის შეფასებები, შეგვიძლია, გამორჩეულად ადეკვატურად მივიჩნიოთ ჩვენს ქვეყანასთან მიმართებით. ეს პოლიტიკოსი და ანალიტიკოსი ცდილობს, სწორად შეაფასოს და სწორი პასუხები გასცეს იმ პრობლემებს, რაც ჩვენს ქვეყანაშია.

ცხადია, რომ ევროკავშირის კონკრეტული ჩინოვნიკები, ევროპარლამენტარები თუ რომელიმე ევროპული სახელმწიფოს თანამდებობის პირები, როდესაც ჩვენს ქვეყანაში მონაწილეობენ ანტისახელისუფლებო მიტინგებში, იღებენ მონაწილეობას გარკვეულ ტრენინგებზე, სადაც პირდაპირ დესტრუქციაზე და რადიკალიზმზეა საუბარი, ეს ჩართულობა ურთიერთობას აფუჭებს.

საქართველოში დასავლური განწყობის გაფუჭება და შერყევა თუ რამეს შეუძლია, ეს ამ ჩინოვნიკების უპასუხისმგებლო და მტრული ქცევებია. ჩვენი ხელისუფლება ამას ყოველთვის ადეკვატურად აფასებდა და, როგორც ხედავთ, ევროპის მაღალი ტრიბუნებიდანაც ისმის შესაბამისი შეფასებები, რომლებიც აბსოლუტურად სწორია“, – აცხადებს დავით მათიკაშვილი.