დავით მათიკაშვილი: მოვუწოდებთ უკრაინას, გამოიჩინოს ის ვალდებულება, შეასრულოს ის პასუხისმგებლობა, რაც ყველა სახელმწიფოს გააჩნია საკუთარი მოქალაქეების მიმართ

 მოვუწოდებთ უკრაინას, გამოიჩინოს ის ვალდებულება, შეასრულოს ის პასუხისმგებლობა, რაც ყველა სახელმწიფოს გააჩნია საკუთარი მოქალაქეების მიმართ, - განაცხადა საპროცედურო საკითხთა და წესების საპარლამენტო კომიტეტის თავმჯდომარემ, დავით მათიკაშვილმა სასაზღვრო გამტარ პუნქტ „დარიალზე“ მყოფი პირების უკრაინაში გაყვანის შესახებ.

მისივე თქმით, უკრაინამ უნდა უზრუნველყოს მათი მოქალაქეების გადაადგილება.

„უკრაინამ უნდა უზრუნველყოს მათი მოქალაქეების გადაადგილება - ბუნებრივია, საქართველოს ტერიტორიის გავლით. ჩვენ არ ვაპირებთ საქართველოში დავუშვათ იმ პირების შემოსვლა, ვისი წარსულიც, ვისი დოკუმენტაციაც და შესაბამისი ვარაუდებიც არ შეესაბამება იმ საკანონმდებლო განაწესებს, რომელიც არსებობს საქართველოში საზღვრის კვეთისთვის“, - განაცხადა მათიკაშვილმა.

შინაგან საქმეთა მინისტრის მოადგილემ, ალექსანდრე დარახველიძემ სამინისტროში გამართულ ბრიფინგზე განაცხადა, საქართველოს შინაგან საქმეთა სამინისტრო კიდევ ერთხელ გამოხატავს სრულ მზადყოფნას, განახორციელოს მის კომპეტენციას მიკუთვნებული ყველა შესაბამისი ღონისძიება და ხელი შეუწყოს უკრაინულ მხარეს ე.წ. ნეიტრალურ ზონაში მყოფი პირების სამშობლოში დაბრუნების პროცესში.