დავით მათიკაშვილი: საქართველოში მომიტინგეთა მხრიდან ძალადობრივ აქციას ნათლავენ, როგორც მშვიდობიანს, ხოლო საფრანგეთში და არა მხოლოდ საფრანგეთში, პოლიციის მხრიდან გამოვლენილ ძალადობის მიმართ გააჩნიათ აბსოლუტური სრული დუმილი

საპროცედურო საკითხთა და წესების საპარლამენტო კომიტეტის თავმჯდომარე დავით მათიკაშვილი საფრანგეთში აქციებზე განვითარებულ მოვლენებს გამოეხმაურა და ევრობიუროკრატები ორმაგ სტანდარტებში დაადანაშაულა.

„აღნიშნულს თავისი ახსნა გააჩნია. მათ აქვთ ჩვეულებრივი, ორმაგი სტანდარტი - ის, რაც დასაშვებია საფრანგეთისთვის, საფრანგეთის პოლიციისთვის, დაუშვებელია საქართველოში და პირიქით, საქართველოში მომიტინგეთა მხრიდან ძალადობრივ აქციას ნათლავენ, როგორც მშვიდობიანს, ხოლო საფრანგეთში და არა მხოლოდ საფრანგეთში, პოლიციის მხრიდან გამოვლენილი ძალადობის მიმართ გააჩნიათ აბსოლუტურად სრული დუმილი.

არის თუ არა ეს აშკარა და ხაზგასმითი თავდასხმა საქართველოზე, ჩვენს სახელმწიფოებრიობაზე?! მცდელობა ჩვენს ქვეყანაში ლეგიტიმურად არჩეული ხელისუფლების შეცვლისა და გამართლება, წახალისება ძალადობის, რაც ყველაზე უფრო მძიმე აღსაქმელი და მოსასმენია ქართველი ხალხისთვის“, - განაცხადა მათიკაშვილმა.

ცნობისთვის, საფრანგეთში ბოლო რამდენიმე დღეა, მასშტაბური საპროტესტო გამოსვლები მიმდინარეობს. მიტინგები სკოლებში სწავლის პირობების გაუმჯობესების მოთხოვნით დაიწყო. თავდაპირველად დემონსტრაციებს სკოლის მოსწავლეები მართავდნენ, ხოლო მოგვიანებით მათ სხვა მოქალაქეებიც შეუერთდნენ. დემონსტრაციები პოლიციელებთან შეტაკებებით სრულდება. ვრცელდება კადრები, სადაც პოლიციელები აქციების მონაწილეების წინააღმდეგ ძალას იყენებენ. ორ შემთხვევაში რეზინის ტყვიის მოხვედრის შედეგად ადამიანმა თვალი დაკარგა ან დაუზიანდა. კიდევ ერთი შემთხვევა ლანსში მოხდა, სადაც 15 წლის მოზარდს ხელი მტევანი მოსწყდა.