"ერთი და იგივე შეცდომას ათჯერ რომ გაიმეორებ და თან გგონია, ამით თბილისს მოატყუებ, არიფი ხარ, აბა, რა ხარ" - გიორგი გახარია ბანერებზე

როგორი არიფები არიან, ასეთ ბანერებს რომ აკეთებენ და მერე ამბობენ, მეც არ მომწონსო, – ასე გამოეხმაურა პარტია „საქართველოსთვის“ ლიდერი გიორგი გახარია ოპოზიციის საწინააღმდეგო ბანერებზე, რომლებზეც მისი ფოტოც არის დატანილი.

გახარიას თქმით, აღნიშნული ფაქტით იგი ძალიან იმედგაცრუებულია და აცხადებს, რომ ეს ის ამორალური კამპანიაა, რომელსაც „ოცნება“ საარჩევნოდ ატარებს.

"სამწუხაროდ, ეს ჩემთვის უდიდესი იმედგაცრუებაა. ეს ყველაფერი მორალს მიღმაა. 

ეგრე ასეთი პოზების დაჭერა, რომ მე რა შუაში ვარ, აი, მაგარი არიფები არიან. როგორი არიფები არიან, ასეთ რაღაცას რომ აკეთებენ და მერე გამოდიან და ამბობენ, მეც არ მომწონსო.

ამორალობის ეს დონე, ფსკერი, იმის მაგივრად, რომ ხალხს ველაპარაკებოდეთ კომუნალურ საკითხებზე, მუნიციპალურ საკითხებზე, გზებზე, ტრანსპორტზე და კიდევ რამეზე, ნუ, არ ვიცი.

ამას ვეძახი, რომ „ოცნება“ გვაბრუნებს წარსულში.

წარსულში იყო „ნაცები“, მაგრამ თბილისელებს ეს ვერ მოატყუებს. ესენი იმიტომ არიან არიფები, რომ ჰგონიათ, ამით გამოძვრებიან, ვერ გამოძვრებიან.

რა მნიშვნელობა აქვს ვისი გაკრულია. მე ვთქვი, არიფები არიან, რომ ჰგონიათ, ამ პლაკატებით ფონს გავლენ. მაშინაც ვთვლიდი, რომ ამ პლაკატებით ფონს ვერ გახვიდოდი.

ერთი და იგივე შეცდომას ათჯერ რომ გაიმეორებ და თან რომ გგონია, ამით თბილისს მოატყუებ, არიფი ხარ, აბა, რა ხარ“, – განაცხადა გიორგი გახარიამ.

დღეს გავრცელდა ბანერები, რომლებზეც ოპოზიციის რამდენიმე ლიდერია გამოსახული წარწერით „არა ნაცებს, არა ბოროტებას! არა ღალატს!“.