გიორგი კახიანი: ოპოზიციის სამართლებრივი არგუმენტაცია რეალურად სრულიად აცდენილია სწორ განმარტებებს, ისინი რაღაც თავისებურ ინტერპრეტაციებს აკეთებენ

ოპოზიციის სამართლებრივი არგუმენტაცია რეალურად სრულიად აცდენილია სწორ განმარტებებს, ისინი რაღაც თავისებურ ინტერპრეტაციებს აკეთებენ, - ამის შესახებ პარლამენტის თავმჯდომარის მოადგილემ გიორგი კახიანმა საკონსტიტუციო სარჩელის განხილვისას მოპასუხე მხარის მიერ გაკეთებულ განცხადებებზე საუბრისას განაცხადა.

„ის არგუმენტები, რაზედაც ადრე საუბრობდნენ, რომ თითქოს სარჩელში რაღაც არის გაუგებარი, მათ ვერ გაიგეს კონსტიტუციის რომელი მუხლი მიემართება თითოეულ მათგანს და ასე შემდგომ, უკვე ყველაფერი ეს გამოჩნდა, რომ ძალიან კარგადაც გაუგიათ ყველაფერი.

ამ პოზიციების წარმოჩენისასაც კი, ისინი არიან ერთმანეთთან შეთანხმებულები ხომ? ანუ, როდესაც ჩვენ ამ მათ ერთიან ძალას ვუწოდებთ, ეს შემთხვევითი არ არის, ჩვენ ვნახეთ, რომ გუშინ „ნაცმოძრაობის“ პოზიცია იყო ძირითადად ის, რომ რაღაც პოლიტიკურ შეფასებებს აკეთებდნენ, ისინი საგამოძიებო კომისიის დასკვნიდან მოჰყავდათ მთელი რიგი შემთხვევები და როგორ აქილიკებდნენ მოწმეთა კონკრეტულ ჩვენებებს და როგორ დასცინოდნენ მათ, ეს გამოჩნდა ყველაფერი.

დღეს ახლა ვიხილეთ ის, რომ უკვე ცდილობენ სამართლებრივი არგუმენტაცია წარმოადგინონ ჩვენს სარჩელთან დაკავშირებით, მაგრამ იმასაც ვხედავთ, რომ ეს სამართლებრივი არგუმენტაცია რეალურად სრულიად აცდენილი არის სწორ განმარტებებს, ისინი რაღაც თავისებურ ინტერპრეტაციებს აკეთებენ“, - აცხადებს გიორგი კახიანი.