გიორგი სოსიაშვილი: ომის დაწყებიდან პირველივე დღეებში ჩვენმა ქვეყანამ უპრეცედენტო დახმარება აღმოუჩინა უკრაინას - ჩვენ კი მივიღეთ ელჩის გაწვევა, ბულინგი, მოწოდება რადიკალებისთვის სახელმწიფო გადატრიალების მცდელობის მიზნით

ომის დაწყებიდან პირველივე დღეებში ჩვენმა ქვეყანამ უპრეცედენტო დახმარება აღმოუჩინა [უკრაინას] რა რესურსიც გაგვაჩნია იმის ფარგლებში, - განაცხადა განათლების, მეცნიერებისა და ახალგაზრდულ საქმეთა კომიტეტის თავმჯდომარის მოადგილემ, საპარლამენტო უმრავლესობის წევრმა გიორგი სოსიაშვილმა.

მისი თქმით, ამის საპასუხოდ, საქართველოდან უკრაინულმა მხარემ ელჩი გაიწვია, ქართულმა მხარემ კი მათგან მიიღო ბულინგი და მოწოდებები სახელმწიფო გადატრიალების მცდელობის მიზნით.

„ომის დაწყებიდან პირველივე დღეებში ჩვენმა ქვეყანამ უპრეცედენტო დახმარება აღმოუჩინა [უკრაინას] რა რესურსიც გაგვაჩნია იმის ფარგლებში. ეს იქნებოდა ჰუმანიტარული დახმარების გაგზავნა, დევნილი უკრაინელების - მოსწავლეების სტუდენტების მიღება და მათთვის შესაფერისი გარემოს შექმნა, ყველა იმ რეზოლუციაზე მიერთება ჩვენი ქვეყნის, რომელიც უკრაინის სუვერენიტეტს მხარს უჭერდა.

ჩვენ რა მივიღეთ - მივიღეთ ელჩის გაწვევა, ბულინგი, მოწოდება რადიკალებისთვის სახელმწიფო გადატრიალების მცდელობის მიზნით და რაც ყველაზე მთავარია აქედან წასული, ძებნილი, საქართველოს მაოხრებელი ადამიანების საკვანძო თანამდებობებზე დანიშვნა.

ჩვენ ვაგრძელებთ უკრაინელ ხალხთან მეგობრობას, მხარდაჭერას, პატივისცემას, მაგრამ ამ ხელისუფლებამ უნდა აღიაროს, რომ ჩვენ მიმართ ძალიან ბევრი უსამართლო ნაბიჯი გადადგეს და ბევრი მიუღებელი რამ ჩაიდინეს“, - განაცხადა სოსიაშვილმა.