ირაკლი ქადაგიშვილი: იმდენად გადააბიჯა დიპლომატიურ წესს გერმანიის ელჩმა, რომ ეს გერმანიაში პოლიტიკური განხილვის საკითხი გახდა და კარგია, რომ ერთ-ერთმა ყველაზე დიდმა ოპოზიციურმა პარტიამ შესაბამისი კითხვა გაუგზავნა გერმანიის მთავრობას

პარლამენტის რეგიონული პოლიტიკისა და თვითმმართველობის კომიტეტის თავმჯდომარე ირაკლი ქადაგიშვილი გამოეხმაურა ინფორმაციას, რომ საქართველოში გერმანიის ელჩის, პეტერ ფიშერის საქმიანობაზე გერმანიის პარლამენტის ფრაქციამ „ალტერნატივა გერმანიისთვის“ გერმანიის საგარეო საქმეთა სამინისტროს ექვსი კითხვით მიმართა.

დეპუტატმა აღნიშნა, რომ ეს კარგი პრეცედენტია.

„იმდენად გადააბიჯა დიპლომატიურ წესს, სხვა ქვეყნის პატივისცემას და მის საქმეებში ჩაურევლობის პრინციპს გერმანიის ელჩმა, რომ ეს რა რა თქმა უნდა, გერმანიაში პოლიტიკური განხილვის საკითხი გახდა და კარგია, რომ ერთ-ერთმა ყველაზე დიდმა და წამყვანმა ოპოზიციურმა პარტიამ ამასთან დაკავშირებით შესაბამისი კითხვა გაუგზავნა გერმანიის მთავრობას. ეს კარგი პრეცედენტია იმისათვის, რომ სხვადასხვა ქვეყნის მიერ მათი საელჩოები შემდგომში არ იყოს გამოყენებული რევოლუციური მოძრაობების გასაღვივებლად”, - განაცხადა ირაკლი ქადაგიშვილმა.

პეტერ ფიშერის საქმიანობასა და სადავო აქტივობებზე კითხვის ნიშნები უკვე გერმანიაშიც გაუჩნდათ. საკითხს ქვეყნის ყველაზე პოპულარული და რეიტინგული პარტია „ალტერნატივა გერმანიისთვის“ - AfD იკვლევს და საგარეო საქმეთა სამინისტროსგან პასუხებს ითხოვს.