"კომისიის შექმნისთვის აუცილებელ 50 ხმას დააკლდეს 3 ხმა" - სააკაშვილი ოპოზიციონერი დეპუტატების მანდატების შეწყვეტაზე

საქართველოს მესამე პრეზიდენტი მიხეილ სააკაშვილი, საქართველოს პარლამენტის გადაწყვეტილებას, ოპოზიციიდან დეპუტატებისთვის მანდატის შეწყვეტის საკითხს სოციალურ ქსელ ფეისბუკში ეხმაურება:

"პარლამენტში, კომისიის შექმნის წინ, სამ დეპუტატს სადეპუტატო უფლებამოსილება გაუუქმეს, რათა კომისიის შექმნისთვის აუცილებელ 50 ხმას დააკლდეს 3 ხმა.

შეგახსენებთ, ეს არაა პირველი შემთხვევა, როცა ადამიანებს ხსნიან იმისთვის, რომ სიმართლე არ გაცხადდეს.

1. მინისტრი ტიკარაძე პრაქტიკულად ჩემს საქმეს გადაჰყვა;

2. ლონდა თოლორაიას მოსახსნელად ცალკე კანონი მიიღეს;

3. მოხსნეს გორის ჰოსპიტლის დირექტორი, ჰოსპიტლის რამდენიმე თანამშრომელი და დააქვეითეს ჩემი მკურნალი ექიმი;

4. მოხსნეს ციხის ადმინისტრაციის მიერ მოწვეული ნევროლოგის მეუღლე, რომელიც ჯანდაცვის სამინისტროში დეპარტამენტს ხელმძღვანელობდა.

მოხსნეს მხოლოდ იმიტომ, რომ დაეთანხმა სახალხო დამცველის და "ემპათიას" კონსილიუმების დიაგნოზს.

და ეს ყველაფერი მოხდა "ოცნების" მოლაპარაკე თავების უტიფარი მტკიცების ფონზე, რომ მათ არაფერი აქვთ დასამალი და არანაირ წამებას ადგილი არ ჰქონია", - აღნიშნულია სააკაშვილის ფეისბუკზე გამოქვეყნებულ ინფორმაციაში.

ბადრი ჯაფარიძის, ელენე ხოშტარიასა და შალვა ნათელაშვილის სადეპუტატო უფლებამოსილების შეწყვეტაზე, საბოლოო გადაწყვეტილება პარლამენტმა ცოტა ხნის წინ მიიღო.

ამავე თემაზე:

🔵 ელენე ხოშტარიას, შალვა ნათელაშვილს და ბადრი ჯაფარიძეს სადეპუტატო მანდატები შეუწყდათ

🔵 პრეზიდენტი: არ ვეთანხმები დეპუტატებისთვის უფლებამოსილების შეწყვეტას!