ლევან მაჭავარიანი: მიხეილ ყაველაშვილმა კიდევ ერთხელ შეახსენა ბატონ დონალდ ტრამპს ჩვენი მზაობა ურთიერთობების გადატვირთვასთან დაკავშირებით

 მიხეილ ყაველაშვილმა კიდევ ერთხელ შეახსენა ბატონ დონალდ ტრამპს ჩვენი მზაობა ურთიერთობების გადატვირთვასთან დაკავშირებით, - განაცხადა ფრაქცია „ქართული ოცნების“ თავმჯდომარის პირველმა მოადგილემ ლევან მაჭავარიანმა.

მისივე თქმით, საქართველოს შეერთებული შტატებისთვის შეთავაზებული აქვს, გაიწეროს კონკრეტული გზამკვლევი, თუ რა ნაბიჯები იქნება გადასადგმელი საქართველოს მხრიდან იმისათვის, რომ ეს ურთიერთობები ახალი ფურცლიდან დაიწყოს.

„მიხეილ ყაველაშვილმა კიდევე ერთხელ შეახსენა ბატონ დონალდ ტრამპს ჩვენი მზაობა ურთიერთობების გადატვირთვასთან დაკავშირებით. ჩვენი პოლიტიკური მზაობა, რიტორიკა, პოლიტიკური ხედვები, მსოფლმხედველობა, ღირებულებათა ნაწილი სრულად თანხვედრაშია აშშ-ის დღევანდელ ადმინისტრაციასთან.

შესაბამისად, რა თქმა უნდა, ჩვენ მოლოდინის რეჟიმში ვართ, რომ რეალური პარტნიორობა აღდგეს. აქედან გამომდინარე, ჩვენ ძალ-ღონეს არ ვიშურებთ, რამდენიმე წერილიც გავაგზავნეთ, დახურულიც, ღიაც, პრეზიდენტმაც მიმართა წერილით და შეახსენა ბატონ ტრამპს, რომ ჩვენ მოლოდინის რეჟიმში ვართ და სასურველია ბატონი ტრამპის მხრიდან რაღაც ნაბიჯები გადაიდგეს უმოკლეს ვადებში. მით უმეტეს, ჩვენ შეთავაზებული გვაქვს, რომ კონკრეტული გზამკვლევი გავწეროთ დროსა და სივრცეში თუ რა ნაბიჯები იქნება გადასადგმელი ჩვენი მხრიდან იმისათვის, რომ ეს ურთიერთობები ახალი ფურცლიდან დაიწყოს“,- აღნიშნა მაჭავარიანმა.

საქართველოს პრეზიდენტმა ნიუ-იორკში, ვიზიტის შეჯამებისას განაცხადა: „აშშ-ის პრეზიდენტს განვუცხადე, რომ დროა ჩვენი ურთიერთობა ახალი ფურცლიდან დაიწყოს“. მისივე თქმით, აშშ-ის პრეზიდენტი მას დაჰპირდა, რომ ურთიერთობების სუფთა ფურცლიდან დაწყების საკითხს დაუბრუნდება და დაუკავშირდება.