ლევან მაჭავარიანი: შეგვიძლია, ამ აქტს ცალსახად ვუწოდოთ მტრული აქტი

„ამ აქტს ცალსახად შეგვიძლია მტრული ვუწოდოთ“, - ასე გამოეხმაურა ფრაქცია „ქართული ოცნების“ თავმჯდომარის მოადგილე ლევან მაჭავარიანი სენატის საგარეო ურთიერთობათა კომიტეტის გადაწყვეტილებას ე.წ. მეგობარ აქტთან დაკავშირებით.

„ამ აქტს ცალსახად შეგვიძლია მტრული ვუწოდოთ, ამაში 2 აზრი არ არის. რა თქმა უნდა, ეს გადაწყვეტილება, რაც გუშინ იქნა მიღებული, ჩვენთვის კითხვის ნიშნებს აჩენს, ვინაიდამ „დიფ სთეით“-თან ბრძოლა დაწყებულია, თუმცა ჯერ კონკრეტულად ამ სტრუქტურებში ვერ ვხედავთ „დიფ სთეითის“ შესუსტებას. უამრავი პროცედურა არის გასავლელი, რასაც თვეები სჭირდება და შემდეგ იქნება იქ საჭირო ბატონი ტრამპის ხელმოწერა და.

ჩვენ დარწმუნებულები ვართ, რა თქმა უნდა, ეს კანონპროექტი კანონპროექტადვე დარჩება და ვერ იქცევა კანონად. საწინააღმდეგო შემთხვევაში, მაშინ მოგვიწევს იმისთვის თვალის გასწორება, რომ თურმე ე.წ. დიფ სთეითი კი არ დამარცხებულა ამერიკის შეერთებულ შტატებში, არამედ პირიქით, გაძლიერდა.

მიზეზი, ასე დაჩქარებულად რომ მოესწროთ, იყო ის, რომ დამატებითი ჟანგბადი მიეწოდებინათ ჩვენი ოპოზიციისთვის იმასთან დაკავშირებით. მოგეხსნებათ, 31 მარტს ოპოზიციას დაანონსებული აქვს ე.წ ბოლო გაფართხალების აქცია და სურთ, ასეთი ტიპის გზავნილებით და ა.შ. უფრო მეტი რაოდენობის ხალხი მოაგროვონ“, - აღნიშნავს საპარლამენტო უმრავლესობის დეპუტატი.