ლევან მაჭავარიანი: ტენდენცია შეიქმნა, როდესაც კონკრეტული ქვეყნების ელჩები თუ დიპლომატები, თავისი ნაბიჯებით, დუმილით რადიკალიზმის წახალისებით თვითონვე ახდენენ თავიანთი თავის დისკრედიტაციას მოქალაქეების აბსოლუტური უმრავლესობის თვალში

პარლამენტის ფრაქცია „ქართული ოცნების“ თავმჯდომარის მოადგილემ ლევან მაჭავარიანმა გადაცემაში „იმედის კვირა“ უცხოური გრანტებით არასამთავრობო ორგანიზაციების დაფინანსებასა და ამ თემაზე საელჩოების ნაწილის დუმილის შესახებ ისაუბრა. მან აღნიშნა, რომ ამ დუმილით საელჩოები თავად ახდენენ საზოგადოების თვალში საკუთარი თავის დისკრედიტაციას.

მან დიდი ბრიტანეთის საელჩოსთვის გრანტების თემაზე პარლამენტის თავმჯდომარის მიმართვაც გაიხსენა.

„ტენდენცია შეიქმნა, როდესაც კონკრეტული ქვეყნების ელჩები თუ დიპლომატები, რა თქმა უნდა, ყველას არ ვგულისხმობ, თავისი ნაბიჯებით, დუმილით, ამ დუმილით შემდეგ რადიკალიზმის წახალისებით თვითონვე ახდენენ თავიანთი თავის დისკრედიტაციას ჩვენი მოქალაქეების აბსოლუტური უმრავლესობის თვალში. როდესაც ჩვენ მივმართავთ მათ ახსნა განმარტებისთვის, ბატონმა შალვა პაპუაშვილმა მიმართა ამ შემთხვევაში, რატომღაც ყოველთვის არის დუმილი და ეს კიდევ უფრო მეტ კითხვის ნიშანს ბადებს საზოგადოებაში ვინაიდან, თუ ეს ყველაფერი ემყარება რაღაც ლოგიკას და ამის უკან რაიმე არგუმენტები არსებობს, რა თქმა უნდა, დუმილს სჯობია, რომ ეს ყველაფერი გაასაჯაროონ და ღიად მიმართონ ჩვენს საზოგადოებას“, - განაცხადა ლევან მაჭავარიანმა.

მან არასამთავრობო ორგანიზაციისთვის - „სოვლაბი“, რომლის ლიდერებიც გიორგი კანდელაკი და “ნაცმოძრაობის“ სიის წევრი ირაკლი ხვადაგიანი არიან, საფრანგეთის ელჩის მიერ აპრილში დაჩქარებული წესით გრანტის გადაცემაც შეაფასა.

„საფრანგეთის ელჩის გადაწყვეტილება არის შოკის მომგვრელი, როდესაც მან გრანტების კანონის მიღებამდე ერთი თუ ორი საათით ადრე გრანტი პირდაპირ გასცა „ნაციონალურ მოძრაობაზე“, - აღნიშნა ლევან მაჭავარიანმა.

პარლამენტის თავმჯდომარემ შალვა პაპუაშვილმა ბრიტანეთის საელჩოს 13 ივნისს მიმართა: „მივმართავ ბრიტანეთის საელჩოს, გაასაჯაროოს, ვის და რა თანხით აფინანსებდა 2024 წლის საპარლამენტო არჩევნებთან დაკავშირებით და ვის და რა თანხით აფინანსებს დღეს“.