მაია ბითაძე: დარწმუნებული ვარ, რომ სუსს ეყოლება ხელმძღვანელი, რომელიც ახალ სიცოცხლეს შესძენს ამ ინსტიტუტს, განსაკუთრებით იმ ამბიციური გეგმების გათვალისწინებით, რომელზედაც მამუკა მდინარაძემ დღეს ისაუბრა

მინდა ვისარგებლო თქვენი ეთერით, ძალიან დიდი წარმატება მინდა ვუსურვო მამუკა მდინარაძეს თავის ახალ პოზიციაზე, ისევე, როგორც წარმატება მინდა ვუსურვო ანრი ოხანაშვილს სამომავლო საქმიანობაში. ეს ორი ძალიან მნიშვნელოვანი კადრია ჩვენი გუნდისთვის, ორი მნიშვნელოვანი და ძლიერი პროფესიონალი, - განაცხადა გადაცემაში „დღის ქრონიკა“ გარემოს დაცვისა და ბუნებრივი რესურსების საპარლამენტო კომიტეტის თავმჯდომარემ, საპარლამენტო უმრავლესობის წევრმა მაია ბითაძემ.

„მამუკა მდინარაძე ძალიან კარგად ვიცით როგორი უნარების ადამიანია. გარდა იმისა, რომ ის ძალიან მაღალი კვალიფიკაციის იურისტია, არის ძალიან კარგი მენეჯერი და ძალიან ენერგიული ადამიანი, რომელსაც აქვს უნარი, ძალიან რთულ სიტუაციებში მართოს ვითარება ძალიან კარგად. მე დარწმუნებული ვარ, რომ სახელმწიფო უსაფრთხოების სამსახურს ეყოლება ხელმძღვანელი, რომელიც ახალ სიცოცხლეს შესძენს ამ ინსტიტუტს, განსაკუთრებით იმ ძალიან ამბიციური გეგმების გათვალისწინებით, რომელზედაც მამუკა მდინარაძემ დღეს ისაუბრა, რაც ძალიან მნიშვნელოვანია ჩვენი ქვეყნის გეოგრაფიული მდებარეობის, გარე ფაქტორების და შიდა ფაქტორების გათვალისწინებით.

ყველას კარგად უნდა გვესმოდეს თუ რა როლი უნდა ჰქონდეს სახელმწიფო უსაფრთხოების სამსახურს ამ ძალიან რთულ გეოპოლიტიკურ ვითარებაში იმის გათვალისწინებით, რომ საქართველოს 20% ოკუპირებულია და ჩვენ ყოველდღიურად გვიწევს ბრძოლა ჩვენი ქვეყნის სუვერენიტეტის დაცვისთვის.

ძალიან მნიშვნელოვანია, რომ ჩვენ გვქონდეს გამართული უსაფრთხოების სისტემა, რაც არის ერთ-ერთი საკვანძო საკითხი, რომელსაც თვალ-ყური უნდა ვადევნოთ ჩვენი სუვერენიტეტის შენარჩუნების პარალელურად“, - აღნიშნა მაია ბითაძემ.