"მთავარია, აღიქვამს თუ არა დასავლეთი საქართველოს თავისიანად და თავისნაირად" - იაგო კაჭკაჭიშვილი

„ჩემი აზრით, მიხეილ სააკაშვილის მმართველობის მძაფრი კრიტიკა (თუნდაც, დამსახურებული) არ არის დღევანდელი ხელისუფლების კრიტიკის საპირწონე“, - ამის შესახებ სოციოლოგი იაგო კაჭკაჭიშვილი, სოციალურ ქსელ ფეისბუკში წერს.

„ამ შემთხვევაში, მორალურ სიბრტყეს არ ვგულისხმობ (ანუ იმას, რომ „მთელი სამყარო ერთი ბავშვის ცრემლადაც არ ღირს“): ამ სიბრტყეზე ყველა ხელისუფლება (და სახელმწიფო), განურჩევლად, ბოროტებაა.

ვგულისხმობ სტრატეგიულ, პრაგმატულ პოლიტიკას.

სხვადასხვა არგუმენტი მაქვს, თუ რატომ ვფიქრობ ასე.

ახლა ერთს მოვიტან: მთელ პოსტსაბჭოთა პერიოდში (შევარდნაძის მმართველობის ჩათვლით), არასოდეს ყოფილა საერთაშორისო დემოკრატიული საზოგადოება ისე განხიბლული საქართველოთი, როგორც ახლაა.

ეს, ჯერჯერობით, ჩვენი სანუკვარი პარტნიორების გახშირებული განცხადებებით შემოიფარგლება, მაგრამ, საბოლოო ანგარიშით (თუ ასე გაგრძელდა), ეს განხიბვლა აუცილებლად გამოიწვევს ქვეყნის მიტოვებას დასავლეთის მიერ.

არ ვამტკიცებ, რომ დღევანდელი ხელისუფლება ამას განგებ აკეთებს. ამას ახლა პრინციპული მნიშვნელობა არც აქვს - მთავარია, აღიქვამს თუ არა დასავლეთი საქართველოს თავისიანად და თავისნაირად.  ვფიქრობ, რომ აღარ, ან - თითქმის აღარ. აი, ამ ნეგატივს ნამდვილად ვერ გადაფარავს სააკაშვილის რეჟიმის კრიტიკა", - დაწერა იაგო კაჭკაჭშილმა.

საქართველოს ექსპრეზიდენტი მიხეილ სააკაშვილი 1 ოქტომბერს დააკავეს და იგი დაკავების დღიდან შიმშილობს. ის ამჟამად იმყოფება სასჯელაღსრულების სისტემის მე-18 სამკურნალო დაწესებულებაში. 11 ნოემბერს მიხეილ სააკაშვილმა განაცხადა, რომ მაღალტექნოლოგიურ კლინიკაში, გარდა გორის სამხედრო ჰოსპიტლისა, გადაყვანის შემთხვევაში, მზად არის შიმშილობა შეწყვიტოს. გაერთიანებული ოპოზიცია კი 6 ნოემბრიდან პერმანენტულ აქციებს მართავს მიხეილ სააკაშვილის მაღალტექნოლოგიურ კლინიკაში გადაყვანის მოთხოვნით.

ასევე დაგაინტერესებთ:

🔵 “თქვენ გგონიათ, ბედნიერია ვინმე, ამ საძაგლობას რომ უყურებს” - ნათია ფანჯიკიძე

🔵 "გაგიზიარებთ კარგ ნიუსებს ჩემ ჯანმრთელობაზე" - ელენე ხოშტარია