"პატიმრის კერძო კლინიკაში გაყვანა მხოლოდ პატიმრის სურვილზეა დამოკიდებული? განსაკუთრებულ სტატუსსა და რეჟიმს არც ერთი პატიმარი არ იმსახურებს" - მიხეილ სარჯველაძე

პარლამენტის ადამიანის უფლებათა დაცვის კომიტეტის თავმჯდომარე, მიხეილ სარჯველაძე სახალხო დამცველის აპარატის განცხადებას გამოეხმაურა და აღნიშნა, რომ მიხეილ სააკაშვილთან დაკავშირებით უსაფრთხოების თვალსაზრისით არავითარი საფრთხე და რისკი არ არსებობს. 

მისი განცხადებით, მე-18 პენიტენციურ დაწესებულებასთან დაკავშირებით მედიკოსთა მულტიფინქციური ჯგუფის დასკვნაზე დაყრდნობით გაკეთდა შეფასება, რომ მოსახერხებელია მიხეილ სააკაშვილისთვის ყველა იმ სერვისის მიწოდება, რაც შექმნილი ვითარების გათვალისწინებით აუცილებელია.

"ამ პირობებში არ შეიძლება, ხელაღებით იმის მოთხოვნა, გინდა თუ არა სერვისის მიწოდება განხორციელდეს რომელიმე კერძო კლინიკაში, ვინაიდან რომელიმე პატიმარს ასე სურს, სამართლებრივი თვალსაზრისით, ეს გაუმართლებელია.

რაც შეეხება ომბუდსმენის განცხადებას, აღნიშნული გარემოებები მხედველობაში მანაც უნდა მიიღოს.

როგორ ფიქრობთ, პატიმრის კერძო კლინიკაში გაყვანა მხოლოდ პატიმრის სურვილზეა დამოკიდებული? – ეს ასე არ არის და განსაკუთრებულ სტატუსსა და რეჟიმს არც ერთი პატიმარი არ იმსახურებს, რადგან წესი ყველასთვის წესია", – განაცხადა სარჯველაძემ.

შეგახსენებთ, სახალხო დამცველის აპარატმა გუშინ განცხადება გაავრცელა, სადაც აღნიშნულია, რომ N18 დაწესებულებაში არსებული ვითარება, სამედიცინო უზრუნველყოფის კუთხით, სრულფასოვნად არ შეესაბამება ექიმთა მულტიფუნქციური ჯგუფის მიერ გაცემულ დასკვნასა და რეკომენდაციებს, ასევე არსებობს გარკვეული რისკები უსაფრთხოების თვალსაზრისით.

სახალხო დამცველის აპარატის შეფასებით, უსტიციის სამინისტრომ/სპეციალურმა პენიტენციურმა სამსახურმა უნდა შეარჩიოს ალტერნატიული სამედიცინო დაწესებულება, სადაც შესაძლებელი იქნება სრულფასოვანი და ადეკვატური სამედიცინო სერვისის და უსაფრთხოების უზრუნველყოფა მიხეილ სააკაშვილისთვის.

საქართველოს მესამე პრეზიდენტი მიხეილ სააკაშვილი 1 ოქტომბერს, თბილისში დააკავეს. იგი სამი ინსტანციის სასამართლოს განაჩენით ცნობილია დამნაშავედ ვალერი გელაშვილის ცემის და სანდრო გირგვლიანის სისხლის სამართლის საქმეებზე და სასჯელის ზომად განსაზღვრული აქვს თავისუფლების აღკვეთა 6 წლის ვადით. აღნიშნულ საქმეებზე სასამართლოს მიერ გამოტანილი გადაწყვეტილებები საბოლოოა და არ საჩივრდება. სააკაშვილი დაკავების დღიდან, 25-ე დღეა შიმშილობს.

ამავე თემაზე:

🔵 "მდგომარეობა უკვე დამძიმდა, ღარიბაშვილის ბრძანებით საავადმყოფოში არ გადაჰყავთ" - ნანუკა ჟორჟოლიანი

🔵 "სააკაშვილი ძალიან დასუსტებულია, მაგრამ არ აპირებს შიმშილობის შეწყვეტას" - ლიზა იასკო

🔵 “კოვიდაპლიკაციის გარეშე, ადამიანი სახლს ვერ უნდა ტოვებდეს” - ბიძინა კულუმბეგოვი