შალვა პაპუაშვილი: მინდა მივმართო „ლელოს“ ამომრჩევლებს, რომ მათ მანდატს ვუფრთხილდებით და გვინდა, რომ არ მოვიქცეთ ისე, როგორც მათ მოექცათ „ლელო“, რომელმაც ჩახსნა საკუთარი მანდატები

მინდა მივმართო „ლელოს“ ამომრჩევლებს, რომ მათ მანდატს ვუფრთხილდებით და გვინდა, რომ არ მოვიქცეთ ისე, როგორც მათ მოექცათ „ლელო“, რომელმაც ჩახსნა საკუთარი მანდატები, - განაცხადა პარლამენტის თავმჯდომარემ შალვა პაპუაშვილმა პარლამენტში გამართულ ბრიფინგზე, რომელიც საკონსტიტუციო სარჩელს ეხებოდა.

მისივე თქმით, სარჩელის შესახებ გაკეთებულ მის განცხადებაში მოცემულია ყველა საკითხი და დასაბუთება.

„ერთ-ერთი მთავარი დასაბუთება, მაგალითად, „ლელოსთან“ დაკავშირებით ზუსტად ის არის, რომ იყვნენ მონაწილენი არჩევნების საბოტაჟისა, არაღიარებისა და ასე შემდეგ და მანდატები მათ დღესაც გაუქმებული აქვთ“, - აღნიშნა პაპუაშვილმა.

მისივე თქმით, მათი სურვილია, პატივი სცენ „ლელოს“ ამომრჩევლებს.

„ვთქვით, კიდევაც, ვინაიდან ჩვენ გვინდა, პატივი ვცეთ მათ ამომრჩევლებს - „ლელომ“ უკვე რამდენჯერმე თავის ამომრჩევლისგან მიღებული მანდატი გადააგდო, გააუქმა. 2020 წლის არჩევნებში, თუ არ ვცდები, 2021-შიც ჰქონდათ ასეთი მცდელობა და ახლაც - ჩვენ გვინდა, რომ ჩვენს მოქალაქეებს, მის ამომრჩევლებს, მივცეთ შესაძლებლობა, რომ ვინაიდან მივიდნენ 4 ოქტომბერს, არჩევნებში ხმა მისცეს და იყვნენ დემოკრატიის პროცესში, მათი ამომრჩეველი არ დაისაჯოს“, - განაცხადა პაპუაშვილმა.

პაპუაშვილმა განმარტა, რომ მუნიციპალიტეტებში „ლელოს“ წარმომადგენლებიდან „გასული არიან ის პირები, რომლის მიმართაც სავარაუდოდ, ამომრჩევლებს ჰქონდათ ნდობა, რომ მანდატი მიეცათ“.

„ამიტომ, მინდა მივმართო „ლელოს“ ამომრჩევლებს, რომ მათ მანდატს ვუფრთხილდებით და გვინდა, რომ არ მოვიქცეთ ისე, როგორც მათ მოექცათ „ლელო“, რომელმაც ჩახსნა საკუთარი მანდატები“, - აღნიშნა პარლამენტის თავმჯდომარემ.

შალვა პაპუაშვილმა დღეს წარადგინა კონსტიტუციური სარჩელი, რომელშიც მოთხოვნილია „ნაციონალური მოძრაობის“, „კოალიცია ცვლილებისთვის“ და „ძლიერი საქართველო-ლელო“ საქმიანობის არაკონსტიტუციურად ცნობა და მათი აკრძალვა.