"შეწყვიტეთ აქტივისტებისა და ჟურნალისტების დაკავების გაუმართლებელი პრაქტიკა" - 10-ზე მეტი NGO შსს-ს მიმართავს

ათზე მეტი არასამთავრობო ორგანიზაცია ერთობლივი განცხადებით მიმართავს შინაგან საქმეთა სამინისტროს, "შეწყვიტოს აქტივისტებისა და ჟურნალისტების დაკავების გაუმართლებელი პრაქტიკა".

ორგანიზაციები აცხადებენ, რომ არაერთხელ მომხდარა ამ დრომდეც დაკავება ადმინისტრაციულ სამართალდარღვევათა კოდექსის 166-ე (წვრილმანი ხულიგნობა) და 173-ე (პოლიციის კანონიერი მოთხოვნისადმი დაუმორჩილებლობა) საფუძვლით.

"წუხელ განვითარებული მოვლენები კიდევ ერთხელ ადასტურებს, რომ ადმინისტრაციულ სამართალდარღვევათა არსებული კანონმდებლობა, პოლიციის ხელში რეპრესიული ინსტურმენტია, რომელიც უფლებების გაუმართლებელი შეზღუდვისათვის გამოიყენება...

მკაფიოდ გვინდა განვაცხადოთ, რომ ადმინისტრაციული წესით დაკავების და დაკავების შემდგომი პრაქტიკა არის მიუღებელი და არღვევს ადამიანის ფუნდამენტურ უფლებებს", - წერია განცხადებაში.

ორგანიზაციები შინაგან საქმეთა სამინისტროს მოუწოდებენ:

"ყველა დაკავებულს მიეცეს ოჯახის წევრებთან დაკავშირების შესაძლებლობა";

"დაკავებულთა ადვოკატებს დროულად მიეწოდოთ ინფორმაცია, რომელ იზოლატორებში არიან გადაყვანილნი მათი დაცვის ქვეშ მყოფი პირები";

"დაუყოვნებლივ მოხდეს დაკავებული პირების გადაყვანა სასამართლოში და დაკავების ვადა 48 საათამდე გაუმართლებელად არ გახანგრძლივდეს".

განცხადებას ხელს აწერენ:

* საქართველოს ახალგაზრდა იურისტთა ასოციაცია (საია)
* საერთაშორისო გამჭვირვალობა - საქართველო

* უფლებები საქართველო

* წამების მსხვერპლთა ფსიქოსოციალური და სამედიცინო რეაბილიტაციის ცენტრი - GCRT
* საქართველოს დემოკრატიული ინიციატივა
* სამართლიანი არჩევნებისა და დემოკრატიის საერთაშორისო საზოგადოება (ISFED)

* ქალთა ინიციატივების მხარდამჭერი ჯგუფი WISG
* ქალთა ფონდი საქართველოში
* საბჭოთა წარსულის კვლევის ლაბორატორია

* სოციალური სამართლიანობის ცენტრი
* ღია საზოგადოების ფონდი
* მწვანე ალტერნატივა

* საქართველოს სასამართლოს გუშაგი
* ადამიანის უფლებათა ცენტრი
* საქართველოს რეფორმების ასოციაცია (GRASS)

ცნობისთვის, წუხელ 2 მარტს, საქართველოს პარლამენტის შენობასთან მიმდინარე აქციაზე ადმინისტრაციული მუხლებით სამართალდამცველებმა 36 ადამიანი დააკავეს.

ასევე დაგაინტერესებთ:

* "დედა ამქვეყნიური ანგელოზიაო, ჩემთვის ყველაზე ჭეშმარიტი ფორმულირებაა, ხო და გუშინ ანგელოზთცვენის მომსწრე ვიყავი" - ნიკო კვარაცხელიას დედის ემოციური პოსტი