ცესკო: არჩევნებისთვის მზადების პროცესი მიკერძოებული პირებისგან მორიგი თავდასხმის საბაბად იქცა

ცენტრალური საარჩევნო კომისია განცხადებას ავრცელებს, რომელშიც ის აქტივობები და პროექტებია აღნიშნული, რომლებიც ცესკომ ჯერ კიდევ არჩევნების გამოცხადებამდე დაიწყო.

როგორც უწყებაში განმარტავენ, განხორციელდა ისეთი მნიშვნელოვანი პროექტები, როგორებიცაა: როგორებიცაა საარჩევნო ადმინისტრაციების საერთაშორისო კონფერენცია, პროექტი „არჩევნები და ელექტრონული ტექნოლოგიები“, ასევე, გაიმართა შეხვედრები ახალგაზრდებთან და საერთო სასამართლოების ადმინისტრაციულ საქმეთა განმხილველ მოსამართლეებთან. ხოლო ამჟამად ტრენერთა კორპუსის გადამზადების პროცესი მიმდინარეობს.

„საარჩევნო ადმინისტრაცია განაგრძობს მზადებას მუნიციპალიტეტის ორგანოთა არჩევნებისთვის. საარჩევნო ადმინისტრაციამ აღნიშნული პროცესი ჯერ კიდევ არჩევნების გამოცხადებამდე დაიწყო და ამ დრომდე არაერთი აქტივობა განახორციელა, რომელიც არჩევნების პროფესიულ დონეზე ჩატარების უზრუნველყოფისკენ არის მიმართული. მათ შორის განხორციელდა ისეთი მნიშვნელოვანი პროექტები, როგორებიცაა საარჩევნო ადმინისტრაციების საერთაშორისო კონფერენცია, რომელშიც 22 ქვეყნის საარჩევნო ადმინისტრაციის, სხვადასხვა სახელმწიფო სტრუქტურისა და საქართველოს საარჩევნო ადმინისტრაციის 100-მდე წარმომადგენელი იღებდა მონაწილეობას.

პროექტი „არჩევნები და ელექტრონული ტექნოლოგიები“, რომელიც ქვეყნის ყველა მუნიციპალიტეტში 7 ეტაპად განხორციელდა და მასში მონაწილეობა მიიღო 4 900-მდე მონაწილემ.

გაიმართა შეხვედრები ახალგაზრდებთან პროექტის „საქართველოს ახალგაზრდული მრჩეველთა საბჭოები - იდეიდან ცვლილებებამდე“ ფარგლებში, რომელშიც მონაწილეობა მიიღო 400-მდე ახალგაზრდამ.

გაიმართა სამუშაო შეხვედრა საერთო სასამართლოების ადმინისტრაციულ საქმეთა განმხილველ მოსამართლეებთან, რომელშიც მონაწილეობა მიიღო 80-მდე პირმა.

როგორც ცესკოში აღნიშნავენ, აღნიშნული აქტივობებისა და პროექტების განსახორციელებლად დახარჯული თანხები ზოგიერთი დაინტერესებული მხარისთვის საარჩევნო ადმინისტრაციაზე თავდასხმის საბაბი გახდა.

მათივე თქმით, კონტექსტიდან ამოგლეჯილი მონაცემების ტირაჟირება ხდება იმგვარად, თითქოს დანახარჯები რამდენიმე თვის მანძილზე ათობით ჩატარებულ ღონისძიებას და ათასობით ადამიანს კი არა, მოკლე პერიოდში დაუდგენელ საჭიროებებს მოხმარდა და ამ მხრივ, რაიმე გადაცდომას აქვს ადგილი.

„ამ ეტაპზე მიმდინარეობს მუნიციპალიტეტის ორგანოთა არჩევნების მოსამზადებელი ფაზის ერთ-ერთი უმნიშვნელოვანესი მიმართულების, ტრენერთა კორპუსის გადამზადების პროცესი. სწავლებას 279 პირი გაივლის. გადამზადებული ტრენერები კი შემდგომ ეტაპზე ტრენინგებს საუბნო საარჩევნო კომისიების ათასობით წევრს ჩაუტარებენ.

ბუნებრივია ყველა ზემოთ ჩამოთვლილი აქტივობის განხორციელება არის ცესკოს სამოქმედო გეგმის ნაწილი. თვეების მანძილზე ათეულობით ღონისძიების ჩატარებას და ათიათასობით ადამიანის გადამზადებას კი - თან ახლავს გარკვეულ ხარჯები. ეს, როგორც ჩანს, ზოგიერთი დაინტერესებული მხარისთვის საარჩევნო ადმინისტრაციაზე თავდასხმის საბაბი გახდა. კონტექსტიდან ამოგლეჯილი მონაცემების ტირაჟირება ხდება იმგვარად, თითქოს დანახარჯები რამდენიმე თვის მანძილზე ათობით ჩატარებულ ღონისძიებას და ათასობით ადამიანს კი არა, მოკლე პერიოდში დაუდგენელ საჭიროებებს მოხმარდა და ამ მხრივ, რაიმე გადაცდომას აქვს ადგილი. მაშინ, როცა ყველა დოკუმენტი, რომელიც აღნიშნული ღონისძიებების განხორციელებასთან არის დაკავშირებული საჯაროა.

საარჩევნო ადმინისტრაცია ერთმნიშვნელოვნად აცხადებს, რომ ორგანიზაციის მიერ განხორციელებული ყველა ხარჯი არის მიზნობრივი და დასაბუთებული. ამ საკითხზე დაინტერესებული მხარეების კომენტარები კი ორგანიზაციის და ზოგადად საარჩევნო პროცესის დისკრედიტაციას ისახავს მიზნად. ცენტრალური საარჩევნო კომისიას არ დატოვებს რეაგირების გარეშე პროცესის დაზიანების არც ერთ მცდელობას და საზოგადოებას მიაწვდის სიმართლეს ყველა საკითხზე, რომელიც მიკერძოებული პირების მიერ მანიპულაციურად იქნება ტირაჟირებული“, - აღნიშნულია ცესკოს მიერ გავრცელებულ განცხადებაში.