"არაა იოლი გასაძლები! ვიცით, ვის რის ფასად უჯდება პატივისა და ღირსების შელახვის დათმენა?! უფლის წყალობით, მე ვუძლებ; აი, დათო ტურაშვილი კი სამწუხაროდ საავადმყოფოში მოხვდა!" - ანდრია ჯაღმაიძე

საპატრიარქოს საზოგადოებასთან ურთიერთობის სამსახურის უფროსი, ანდრია ჯაღმაიძე სოციალურ ქსელში დათო ტურაშვილის ირგვლივ განვითარებულ მოვლენებს ეხმაურება და წერს, რომ "პატივის და ღირსების შელახვის დათმენა იოლი გასაძლები არაა".

მისივე თქმით, ის "უფლის წყალობით უძლებს, ტურაშვილი, კი საავადმყოფოში მოხვდა". ჯაღმაიძე ამბობს, რომ ახლა კონკრეტულს არაფერს შეახსენებს ტელევიზიებს, რომლებსაც "არაერთხელ ანალოგიური რამ გაუკეთებიათ", მათ შორის მის მიმართ.

"ერთგვარი დალოცვის ფორმა შეიძინა სიტყვებმა, - "გაძლება მოგცეს ღმერთმა"! ახლობლები, ნაცნობები, უცხო ადამიანები ამ სიტყვებს ხშირად მეუბნებიან.

არაა იოლი გასაძლები! ვიცით, ვის რის ფასად უჯდება პატივისა და ღირსების შელახვის დათმენა?! უფლის წყალობით, მე ვუძლებ; აი, დათო ტურაშვილი კი სამწუხაროდ საავადმყოფოში მოხვდა! მინდა ჯანმრთელობა ვუსურვო მას და ასევე ვისურვო, რომ ჩვენი საზოგადოება მეტად დაუფიქრდეს მის ნათქვამს, რომ სიტყვებიც შეიძლება მკვლელობის იარაღად იქცეს!

ახლა კონკრეტულს არაფერს შევახსენებ ტელევიზიებს, რომლებსაც არაერთხელ ანალოგიური რამ გაუკეთებიათ, და მათ შორის ჩემს მიმართაც, ინტერნეტსივრცე კი, ისეთი რეალობაა, რომ, თუ იქ ერთხელ რამე მოხვდა, მუდმივად რჩება და მუდმივად შეგვახსენებს ამას.

ამ ტელევიზიების საყურადღებოდ მინდა ვთქვა: კარგია, დათო ტურაშვილს რომ ექომაგებით, მართლაც დაინახეთ რომ მკვლელობის, სამშობლოს ღალატისა და სხვა ცილისწამებათა დაბრალება ცუდი საქციელია?! იმედი ვიქონიოთ, რომ ხვალიდან ამგვარ უღირს საქციელს თავადაც მოერიდებით? ან შენდობას ითხოვთ უკვე ჩადენილზე? ან ამ პოსტს მშვიდად და გაცნობიერებულად მიიღებთ?", - წერს ანდრია ჯაღმაიძე.

შეგახსენებთ, გუშინ 19 მარტს ტელეკომპანია "ფორმულას" ეთერში ემოციური გამოსვლის შემდეგ, მწერალი დათო ტურაშვილი შეუძლოდ გახდა, რის გამოც ის კლინიკაში გადაიყვანეს. ტურაშვილი ფორმულას ეთერში რუსული კანონის კრიტიკის გამო მის მიმართ აგორებულ კამპანიაზე საუბრობდა.