"მოხუცმა ბებომ, რომელიც აღმაშენებლის კარფურის წინ იდგა, ფული კი არა, ხუთი კვერცხი მთხოვა... ვერ წარმოიდგენთ, როგორ რცხვენოდა" - რას წერს პოეტი კატო ჯავახიშვილი

პოეტი კატო ჯავახიშვილი სოციალურ ქსელში წერს:

"მოხუცმა ბებომ, რომელიც აღმაშენებლის კარფურის წინ იდგა, ფული კი არა, ხუთი კვერცხი მთხოვა.

აქამდე იქ არასდროს მინახავს.

ვერც კი წარმოიდგენთ, როგორ რცხვენოდა, ხელები და ხმა ერთნაირად უკანკალებდა - მოწყალებას კი არა ხუთ კვერცხს ითხოვდა.

დადიოდა უამრავი ტურისტი ირგვლივ, ეკონომიკის აღმასვლას ასე სამაგალითოდ რომ უწყობენ ხელს, კიდევ ადამიანები  - ჩქარი, საქმიანი ნაბიჯებით.

სანოვაგის სწრაფად ყიდვა და სახლში მიტანა, აი, რა იყო მათი მიზანი.

დაღლილი ადამიანების სევდაა ეს, როგორმე შეასწრონ სახლში, როგორც ციხესიმაგრეში ისე შეიბუდონ, რომ არაფერი დაინახონ, არაფერი გაიგონ, ცოტა ხნით არ მოშივდეთ.

ახალგაზრდებიც დადიოდნენ, ამ ქვეყნიდან წასასვლელ გზებსა და შესაძლებლობებს უზიარებდნენ ერთმანეთს.

ფერადები, ჯერ კიდევ ციცინათელები რომ ჰყავთ თვალებში.

ეს ციცინათელები, რომ გადაარჩინონ, უნდა გაიქცნენ.

ჩემოდნის ჩალაგების დროც არ არის, თორემ  ცოტაც და, ნიჰილიზმში ჩაძირულებს, უმომავლო სამშობლო ვალდებულებების მარწუხებში მოიმწყვდევს და მერე ყველაფერი გვიანი იქნება.

მერე მხოლოდ სხვისი სამსახურის სანაცვლოდ აღებული გროშებით ბავშვების გამოკვება იქნება შესაძლებელი.  

უამრავი ადამიანით სავსე ივლისის ქალაქი მკვდარი იყო.

თითქოს თეატრის დეკორაციად ქცეულიყო სხვა დანარჩენი და იდგა მხოლოდ ბებო, ამ აბსურდულ სინამდვილეში, გაწყალებული სიტყვების ქვეყანაში იდგა და ხუთ კვერცხს მთხოვდა",- წერს კატო ჯავახიშვილი.

ასევე დაგაინტერესებთ:

📍საოკუპაციო რეჟიმის მიერ უკანონოდ დაკავებული ქრისტინე თაკალანძის პატიმრობიდან გასათავისუფლებლად მიმდინარეობს აქტიური მუშაობა ყველა არსებული მექანიზმის გამოყენებით - სუსი

📍პრეზიდენტმა დღეს 11 მსჯავრდებული შეიწყალა - მათ შორის ერთი ქალია