ფეხბურთელი ვაკო ყაზაიშვილი მედიაში გავრცელებულ ჩანაწერებთან დაკავშირებით პირველ კომენტარს აკეთებს და საზოგადოებას ცოლის ძმის განცხადების გამო ბოდიშს უხდის

საქართველოს საფეხბურთო ნაკრები დიდ სკანდალში გაეხვია.

მედიაში დღეს გავრცელებული ინფორმაციით, წითელი ცირკულარით ძებნილი პირი, ნოდარ ნიშნიანიძე საქართველოს საფეხბურთო ნაკრების წევრებს სიცოცხლის მოსპობით და ცემით ემუქრება.

"პირველ რიგში ქართველი ფეხბურთის ქომაგებს, საქართველოს ყველა მოქალაქეს ბოდიშს ვუხდი ფაქტისთვის, რომელიც ჩემთვის ყველაზე მეტად მიუღებელია.

ფეხბურთის თამაში 7 წლის ასაკში დავიწყე.

ყველამ, ვინც დღეს, ჩვენს დიდ საფეხბურთო ოჯახს წარმოადგენს იცის რამდენი შრომა ჩავდე ჩემი კარიერის შენებაში.

პირველად ნაკრებში 9 წლის წინ გამომიძახეს და ეს იყო ყველაზე მნიშვნელოვანი დღე ჩემს კარიერაში.

ეროვნული ნაკრების გარეშე ფეხბურთელის კარიერული ცხოვრება სრულფასოვანი არასოდესაა.

ყველა ფეხბურთელისთვის, ყველაზე მნიშვნელოვანი და ფასეული სწორედ ნაკრებია და მეც არ ვარ გამონაკლისი.

ცხოვრებაში არავინ დამჭირვებია მინდორზე მოსახვედრად.

ყველამ, ვისაც ფეხბურთი უყვარს იცის რომ ჩემს მიერ გატანილი გოლების და დაშვებული შეცდომების უკან მხოლოდ მე ვდგავარ.

არავინ და არაფერი ჩემი შრომის და ფეხბურთის სიყვარულის გარდა.

ყველამ, ვინც წარმოადგენს ნაკრებს და ფედერაციას იცის, რომ ეს ჩანაწერი ყველაზე ბოლომ მოვისმინე. თქვენთვის ამ ჩანაწერში ნაკრების წევრებზე საუბრობენ და ჩემთვის მეგობრებზე.

ამიტომ განსაკუთრებით მძიმე და მიუღებელია საუბრის შინაარსი ჩემთვის.

ნაკრებს აქვს ისტორიული შანსი და ამ შანსის გამოსაყენებლად ყველაფერს გავიღებ.

ყველანაირ პირადულ წინააღმდეგობას გადავლახავ.

ჩემთვის მთავარია არ დაზარალდეს ჩვენი დიდი საფეხბურთო ოჯახი და ამიტომ მზად ვარ მივიღო ფედერაციის ნებისმიერი გადაწყვეტილება", - წერს ყაზაიშვილი.

„შაბათის ფორმულას“ ინფორმაციით, ნიშნიანიძე ქართველი ფეხბურთელის, ვაკო ყაზაიშვილის ცოლის ძმაა.

ნიშნიანიძე მიიჩნევს რომ მისი და „ქართული ოცნების“ წევრების დაპირისპირების გამო, გადაწყვეტილების მიმღებმა პირმა ვაკო ყაზაიშვილი დასაჯა და არ ათამაშა.

გავრცელებულ ინფორმაციას სოციალურ ქსელში გამოეხმაურა თავად ფეხბურთელი და საზოგადოებას ბოდიში მოუხადა.