"ჩერნობილში უკვე დაფიქსირებულია გამა-გამოსხივების საკონტროლო დონეების გადაჭარბება. მეორე ჩერნობილის გამეორების საფრთხეა, რომლისგანაც ევროპა ჯერ კიდევ იკურნება" - უკრაინის ენერგეტიკის სამინისტრო

რუსეთის საოკუპაციო ძალები უკვე მეორე დღეა, ჩერნობილის ატომური ელექტროსადგურის პერსონალს აკავებენ და როტაციის საშუალებას არ აძლევენ.

ამის შესახებ უკრაინული მედია ქვეყნის ენერგეტიკის სამინისტროზე დაყრდნობით იტყობინება.

„ოკუპანტები უკვე მეორე დღეა, ჩერნობილის ატომური ელექტროსადგურის პერსონალს აკავებენ და ტექნიკური უსაფრთხოების წესებით გათვალისწინებული როტაციის საშუალებას არ აძლევენ.

სადგურის აღება და იქ ნებისმიერი ტიპის სამხედრო ოპერაციების ჩატარება მეორე ჩერნობილის გამეორების საფრთხითაა სავსე, რომლისგანაც ევროპა ჯერ კიდევ იკურნება“, – აღნიშნულია განცხადებაში.

უწყებაში აღნიშნავენ, რომ მძიმე სამხედრო ტექნიკის გადაადგილებით გამოწვეული ნიადაგის ზედა ფენის დარღვევის გამო, უკვე დაფიქსირებულია გამა-გამოსხივების საკონტროლო დონეების გადაჭარბება გამორიცხვის ზონაში.

„ამჟამად, მთელი პასუხისმგებლობა ბირთვულ და რადიაციულ უსაფრთხოებაზე, ობიექტის მდგომარეობასა და გამორიცხვის ზონაში სიტუაციის შემდგომ განვითარებაზე ეკისრება დამპყრობლებს.

ეს არის ერთ-ერთი ყველაზე სერიოზული საფრთხე დღეს ევროპისთვის, რადგან ჰიბრიდული ომის დროს ჩერნობილის ატომურ ელექტროსადგურზე დამპყრობლების ნებისმიერი პროვოკაცია შეიძლება, გადაიზარდოს მორიგ პლანეტარულ ეკოლოგიურ კატასტროფაში“, – განაცხადეს უკრაინის ენერგეტიკის სამინისტროში.

სხვა სიახლეები:

🔲 სტოლტენბერგი: კრემლი ცდილობს, რომ ნატომ და ევროკავშირმა თავის პარტნიორებს ნაკლები მხარდაჭერა გაუწიონ - ჩვენი კოლექტიური პასუხი მეტი მხარდაჭერა უნდა იყოს ისეთი ქვეყნებისთვის, როგორიცაა საქართველო, მოლდოვა და ბოსნია და ჰერცეგოვინა

🔲 Amnesty International: რუსი სამხედროები უკრაინაში საერთაშორისო ჰუმანიტარულ სამართალს არღვევენ

🔲 "თითქოს სადღაც ხარ მაგრამ რეალურად არსად არ ხარ, რადგან შენი სახლის კარი შენთვის აღარ არის ღია" - ნათია თოდუა რუსეთ-უკრაინის ომზე

 🔲  უკრაინაში შეჭრის შემდეგ ოკუპანტებმა 2.800 სამხედრო დაკარგეს - ბოლო ორი დღის მონაცემები