"სპეცოპერაციის შეჩერება შესაძლებელია მხოლოდ იმ შემთხვევაში, თუ კიევი შეწყვეტს ბრძოლას და შეასრულებს რუსეთის მოთხოვნებს" - პუტინი

"დონბასის დასაცავად სპეცოპერაციის შეჩერება შესაძლებელია მხოლოდ იმ შემთხვევაში, თუ კიევი შეწყვეტს ბრძოლას და შეასრულებს რუსეთის მოთხოვნებს",- განაცხადა ვლადიმერ პუტინმა თურქეთის პრეზიდენტ რეჯეფ ტაიპ ერდოღანთან საუბრისას. ამის შესახებ კრემლის პრესსამსახური იტყობინება.

კრემლის პრესსამსახურის მიერ გავრცელებულ ცნობაში აღნიშნულია, რომ „რუსეთი მზადაა უკრაინის ხელისუფლებასთან და უცხოელ პარტნიორებთან კონფლიქტის მოგვარების მიზნით დიალოგისთვის“.

ერდოანთან თითქმის ერთსაათიანი საუბრის განმავლობაში, პუტინმა ყურადღება გაამახვილა კიევის მხრიდან „მოლაპარაკებების გაჭიანურების მცდელობაზე“:

„იმედი მაქვს, ახალ შეხვედრაზე უკრაინელი მომლაპარაკებლები გამოავლენენ უფრო კონსტრუქციულ მიდგომას, რომელიც სრულად ითვალისწინებს ახალ რეალობას“, - თქვა მან.

რუსეთის პრეზიდენტი ირწმუნება, რომ რუსეთის შეიარაღებული ძალები ყველაფერს აკეთებენ სიცოცხლის გადასარჩენად და მშვიდობიანი მოსახლეობის უსაფრთხოების უზრუნველსაყოფად: „ზუსტი დარტყმები განხორციელდება მხოლოდ სამხედრო ინფრასტრუქტურაზე“, - განაცხადა ვლადიმირ პუტინმა.

კრემლის პრესსამსახურის ცნობით, ერდოანმა გააკრიტიკა რუსული კულტურისა და მისი მოღვაწეების დისკრიმინაციის კამპანია, რომელიც დასავლეთში სულ უფრო და უფრო მატულობს.

ხოლო საპასუხოდ, პუტინმა დაადასტურა რუსული მხარის მზადყოფნა, ხელი შეუწყოს თურქეთის მოქალაქეების უსაფრთხო ევაკუაციას რეგიონებიდან, სადაც ბრძოლები მიმდინარეობს.

თურქეთის პრეზიდენტის ოფისის ცნობით, ერდოანმა ასევე გამოაცხადა მზადყოფნა, წვლილი შეიტანოს სიტუაციის მშვიდობიან მოგვარებაში.

თურქეთის პრეზიდენტის თქმით, ის ინარჩუნებს კონტაქტს კიევთან და სხვა ქვეყნებთან და გააგრძელებს ძალისხმევას „ყოვლისმომცველი მოლაპარაკებების გამართვისა და შედეგების მისაღწევად“.

თურქეთის პრეზიდენტის ადმინისტრაციის ცნობითვე, რეჯეფ ტაიპ ერდოანმა ვლადიმირ პუტინს უკრაინაში ცეცხლის შეწყვეტისკენ, ჰუმანიტარული დერეფნების გახსნისა და სამშვიდობო შეთანხმების ხელის მოწერისაკენ მოუწოდა.

ასევე წაიკითხეთ:

🔵 რუსეთი ოდესის დასაბომბად ემზადება - ვოლოდიმირ ზელენსკი

🔵რუსეთის როსსელხოზნადზორი 15 ქართულ კომპანიას საშუალებას აძლევს, რუსეთში რძე და რძის პროდუქტები შეიტანოს

🔵ალა პუგაჩოვა, შესაძლოა თბილისში გადმოცხოვრდეს