„აშშ-თან ერთად ვგეგმავთ შემდგომ ნაბიჯებს რუსეთის აგრესიის შესაჩერებლად და გრძელვადიანი მშვიდობის უზრუნველსაყოფად“ - ზელენსკი ტრამპთან საუბრის შემდეგ

 უკრაინის პრეზიდენტ ვოლოდიმირ ზელენსკის თქმით, ამერიკელ კოლეგა დონალდ ტრამპთან საუბრის დროს მათ  შემდგომი კონტაქტები განიხილეს. ამის შესახებ ზელენსკიმ X-ზე დაწერა.

„მნიშვნელოვანი საუბარი მქონდა აშშ-ის პრეზიდენტ დონალდ ტრამპთან. ჩვენ დიდხანს ვისაუბრეთ მშვიდობის მიღწევის შესაძლებლობებზე, ჩვენს მზადყოფნაზე, ვიმუშაოთ გუნდურ დონეზე, ჩვენს ტექნოლოგიურ შესაძლებლობებზე, მათ შორის დრონებსა და სხვა თანამედროვე წარმოებაზე. მადლობელი ვარ პრეზიდენტ ტრამპის დაინტერესებისთვის, თუ რა შეგვიძლია ერთად გავაკეთოთ“, - განაცხადა ზელენსკიმ.

მან ასევე აღნიშნა, რომ ტრამპთან განიხილა მისი საუბარი აშშ-ის სახაზინო მდივანთან სკოტ ბესენტთან, რომელიც უკრაინაში ჩავიდა მინერალების შესახებ შეთანხმების განსახილველად. აშშ-ის პრეზიდენტმა, თავის მხრივ, მას პუტინთან საუბრის დეტალები გააცნო.

ზელენსკიმ ხაზგასმით აღნიშნა, რომ უკრაინას „ყველაზე მეტად სურს მშვიდობა“.

„ჩვენ შეერთებულ შტატებთან ერთად ვგეგმავთ ჩვენს შემდგომ ნაბიჯებს რუსეთის აგრესიის შესაჩერებლად და გრძელვადიანი, საიმედო მშვიდობის უზრუნველსაყოფად. როგორც პრეზიდენტმა ტრამპმა თქვა, მოდით, ეს დავასრულოთ.

ჩვენ შევთანხმდით, რომ შევინარჩუნოთ შემდგომი კონტაქტი და დავგეგმოთ მომავალი შეხვედრები“, - წერს უკრაინის პრეზიდენტი.