ევროკავშირი და ლონდონი სომხეთისა და აზერბაიჯანის ერთობლივ სამშვიდობო დეკლარაციას მიესალმებიან, რომელსაც ხელი თეთრ სახლში ტრამპის შუამავლობით მოეწერა

 ევროკავშირი და გაერთიანებული სამეფო მიესალმებიან სომხეთსა და აზერბაიჯანს შორის მშვიდობიანი ურთიერთობების შესახებ ერთობლივ დეკლარაციას, რომელსაც 8 აგვისტოს ვაშინგტონში აშშ-ის პრეზიდენტის დონალდ ტრამპის მონაწილეობით მოეწერა ხელი, ნათქვამია ევროკომისიის პრეზიდენტის ურსულა ფონ დერ ლაიენისა და ევროპული საბჭოს პრეზიდენტის ანტონიო კოშტას ერთობლივ წერილში, ასევე, დიდი ბრიტანეთის საგარეო საქმეთა მინისტრის დევიდ ლემის განცხადებაში.

ევროპელი ლიდერების მიერ გამოქვეყნებულ განცხადებაში მითითებულია, რომ თეთრ სახლში სამი ქვეყნის ლიდერების - ალიევის, ფაშინიანისა და ტრამპის - მიერ ხელმოწერილი დოკუმენტი „მნიშვნელოვანი მოვლენაა“, რომელიც გზას უხსნის „ხანგრძლივ და მდგრად მშვიდობას ორივე ქვეყანასა და მთელ რეგიონში“.

„ახლა მნიშვნელოვანია შეთანხმებული ნაბიჯების დროული განხორციელების უზრუნველყოფა, რათა გარანტირებული იყოს მდგრადი და უწყვეტი პროგრესი სომხეთსა და აზერბაიჯანს შორის ურთიერთობების სრულფასოვანი ნორმალიზაციის გზაზე“, - დასძინეს პოლიტიკოსებმა.

ლემიმ სოციალურ ქსელ X-ზე გამოქვეყნებულ პოსტში მიულოცა სომხეთსა და აზერბაიჯანს „ვაშინგტონში მშვიდობისკენ გადადგმული გაბედული ნაბიჯები“. „მე ვაფასებ აშშ-ის პრეზიდენტის მნიშვნელოვან როლს ამ გარღვევის მიღწევაში“, - აღნიშნა მინისტრმა.

რას გულისხმობს შეთანხმება, რომელსაც ხელი თეთრ სახლში მოეწერა?

ხელმოწერილი დეკლარაციის დეტალები აზერბაიჯანის პრეზიდენტისა და სომხეთის პრემიერ-მინისტრის ადმინისტრაციების მიერ გამოქვეყნდა. ის შვიდი პუნქტისგან შედგება, მათ შორის:

📌 ევროპის უსაფრთხოებისა და თანამშრომლობის ორგანიზაციისადმი (ეუთო) ქვეყნების საგარეო საქმეთა მინისტრების მიმართვის დადასტურება ყარაბაღის კონფლიქტის მოგვარების საკითხებში მინსკის ჯგუფის დაშლის მოთხოვნასთან დაკავშირებით [ალიევმა ეს მოთხოვნა არაერთხელ წამოაყენა];

📌 რეგიონული კომუნიკაციების განბლოკვის მნიშვნელობის დადასტურება „სახელმწიფოების სუვერენიტეტის, ტერიტორიული მთლიანობისა და იურისდიქციის პატივისცემის საფუძველზე“;

📌 სომხეთის თანამშრომლობა ამერიკის შეერთებულ შტატებთან და მესამე ქვეყნებთან მის ტერიტორიაზე სატრანზიტო დერეფნის, სახელწოდებით „ტრამპის მარშრუტი საერთაშორისო მშვიდობისა და კეთილდღეობისთვის“ (TRIPP), ორგანიზების საკითხში; სომხეთი ამ დერეფნის მართვის უფლებას 99 წლით ამერიკის შეერთებულ შტატებს გადასცემს;

📌 აღიარება იმისა, რომ საჭიროა „წარსულის კონფლიქტებისგან თავისუფალი, უკეთესი მომავლისკენ მიმართული კურსის დასახვა“.