ფრიდრიხ მერცი აცხადებს, რომ მას პირადი შეურაცხყოფა არ აწუხებს, თუმცა სურს, კანონში ცვლილება შეიტანოს, რათა სახელმწიფო ინსტიტუტები ცილისწამებისგან დაცული იყოს

გერმანიის კანცლერმა ფრიდრიხ მერცმა განაცხადა, რომ მას პირადი შეურაცხყოფა არ აწუხებს, თუმცა სურს, კანონში ცვლილება შეიტანოს, რათა სახელმწიფო ინსტიტუტები და სამთავრობო უწყებები ცილისწამებისგან დაცული იყოს. გერმანიის მთავრობის მეთაურის განცხადებას Deutsche Welle ციტირებს.

მერცმა აღიარა, რომ წარსულში პირადი შეურაცხყოფის შემდეგ ცილისწამების ბრალდებით სასამართლოში საჩივრები შეიტანა, თუმცა, ხაზგასმით აღნიშნა, რომ ამის კეთება შეწყვიტა და კანცლერად დანიშვნის შემდეგ მსგავსი ზომები აღარ მიუღია.

„თუ ვინმე იდიოტს მიწოდებს, ეს მისი საქმეა. მე სხვა აზრი მაქვს, მაგრამ ეს მას დანაშაულად არ აქცევს“, - აღნიშნა მან.

გერმანიაში დებატები იმის შესახებ, თუ სად გადის ზღვარი გამოხატვის თავისუფლებასა და პირად შეურაცხყოფას შორის, მას შემდეგ დაიწყო, რაც პროკურატურამ სისხლის სამართლის საქმე აღძრა სტუდენტის წინააღმდეგ, რომელმაც ბერლინში გამართული დემონსტრაციის დროს ბანერი აღმართა, რომელზეც, სავარაუდოდ, მერცის შეურაცხმყოფელი წარწერა იყო დატანილი. სოციალური მედიის ზოგიერთი მომხმარებელი ასევე დაჯარიმდა ცილისმწამებლური კომენტარებისთვის.

მერცმა აღნიშნა, რომ ბრალდებები, როგორც წესი, სახელმწიფო პროკურორების მიერ არის წაყენებული და არა თავად პოლიტიკოსების მიერ და დასძინა, რომ „გაოცებულია“ იმით, რომ საქმეების რაოდენობა დიდია. თუმცა, მისი თქმით, სახელმწიფო ინსტიტუტები და თანამდებობები ცილისწამებისგან უნდა იყოს დაცული, რათა დემოკრატიული სისტემის პატივისცემა შენარჩუნდეს.

„როგორც კი საჯარო თანამდებობა ცილისწამების სამიზნე ხდება, გართობა სრულდება. ჩვენ, როგორც საზოგადოებამ, უნდა შევძლოთ ამასთან ბრძოლა, რადგან ეს აღარ არის გამოხატვის თავისუფლება; ეს აზიანებს ჩვენს დემოკრატიას“, - ხაზგასმით აღნიშნა მან.

ამ მიზნით, მერცმა განაცხადა, რომ მზად არის გერმანული კანონმდებლობის 188-ე პუნქტის რეფორმირებისთვის, რომელიც გარკვეულ გარემოებებში იცავს პოლიტიკოსებს შეურაცხყოფისა და ცილისწამებისგან.