ნეთანიაჰუ ღაზაში ომის დასრულების შესახებ ტრამპის გეგმას მხარს უჭერს

 ისრაელის პრემიერ-მინისტრმა, ბენიამინ ნეთანიაჰუმ განაცხადა, რომ მხარს უჭერს დონალდ ტრამპის გეგმას ღაზაში ომის დასრულების შესახებ, რასაც მან „მნიშვნელოვანი ნაბიჯი“ უწოდა ახლო აღმოსავლეთში მშვიდობის მისაღწევად.

თეთრი სახლში გამართულ ერთობლივ პრესკონფერენციაზე ნეთანიაჰუმ აღნიშნა:

„მიმაჩნია, რომ დღეს ჩვენ გადავდგამთ კრიტიკულ ნაბიჯს, როგორც ღაზაში ომის დასრულების, ასევე ახლო აღმოსავლეთში, და ვფიქრობ, ახლო აღმოსავლეთის ფარგლებს გარეთაც, მშვიდობის დრამატული წინსვლის საფუძვლის მოსამზადებლად“.

პრემიერ-მინისტრმა ხაზგასმით აღნიშნა, რომ ტრამპის გეგმა ისრაელის სამხედრო მიზნების მიღწევას ემსახურება.

„მხარს ვუჭერ თქვენს გეგმას ღაზაში ომის დასრულების შესახებ, რომელიც მიაღწევს ომის ჩვენს მიზნებს. ის დააბრუნებს ისრაელში ყველა ჩვენს მძევალს, დაშლის „ჰამასის“ სამხედრო შესაძლებლობებს და მის პოლიტიკურ მმართველობას და უზრუნველყოფს, რომ ღაზა ისრაელისთვის საფრთხეს აღარასოდეს შექმნის“, - დასძინა ნეთანიაჰუმ.

ამ განცხადების გაკეთებამდე ცოტა ხნით ადრე, პრეზიდენტმა ტრამპმა განაცხადა, რომ თეთრმა სახლმა გამოაქვეყნა გეგმა ღაზაში ომის დასრულების შესახებ.

ტრამპის თქმით, ეს გეგმა მოიცავს საერთაშორისო გარდამავალი მმართველობის საბჭოს შექმნას, რომელსაც თავად უხელმძღვანელებს. გეგმა მოითხოვს ცეცხლის დაუყოვნებლივ შეწყვეტას, ყველა დარჩენილი მძევლის გათავისუფლებას 72 საათის განმავლობაში - თუ „ჰამასი“ დათანხმდება - და ისრაელის ძალების ეტაპობრივ გაყვანას.

ტრამპმა ასევე განაცხადა, რომ თუ „ჰამასი“ უარყოფს შეთანხმებას, ნეთანიაჰუს ექნება აშშ-ის სრული მხარდაჭერა „საქმის ბოლომდე მისაყვანად“.