ოლაფ შოლცი - უკრაინის მხარდაჭერამ გერმანიის სხვა ხარჯებზე არ უნდა იმოქმედოს

გერმანიის კანცლერმა, ოლაფ შოლცმა ქალაქ ბილეფელდში გამართული კამპანიის დროს განაცხადა, რომ ის ეწინააღმდეგება უკრაინისთვის იარაღის მიწოდების გაზრდას, თუ ეს მოითხოვს ბიუჯეტის სხვა პუნქტებისთვის დაფინანსების შემცირებას.

„მე წინააღმდეგი ვარ, რომ ეს თანხები პენსიებიდან ავიღოთ. მე წინააღმდეგი ვარ, რომ ეს გავაკეთოთ ადგილობრივი ბიუჯეტების შემცირების გზით. მე წინააღმდეგი ვარ, რომ ნაკლები თანხა ჩავდოთ სარკინიგზო და საავტომობილო გზებში“, – აღნიშნა გერმანიის კანცლერმა.

ამასთან, გერმანულმა გამოცემა Der Spiegel-მა 9 იანვარს გაავრცელა ინფორმაცია, რომლის თანახმადაც გერმანიის საგარეო საქმეთა მინისტრ ანალენა ბერბოკს და თავდაცვის მინისტრ ბორის პისტორიუსს სურთ, რომ ბერლინმა უკრაინას დამატებით 3 მილიარდი ევროს სამხედრო დახმარება გაუწიოს გერმანიაში 23 თებერვალს დანიშნულ საპარლამენტო არჩევნებამდე, რასაც კანცლერი ოლაფ შოლცი ეწინააღმდეგება.

გერმანიის თავდაცვის მინისტრმა ბორის პისტორიუსმა უარყო მედიაში გავრცელებული ინფორმაცია იმის შესახებ, რომ შოლცი, სავარაუდოდ, ბლოკავს უკრაინის 3 მილიარდი ევროს ღირებულების სამხედრო დახმარების დამატებით პაკეტს. პისტორიუსმა თქვა, რომ გადაწყვეტილება ჯერ მიღებული არ არის.