ორბანი: ბრიუსელმა გასცა ბრძანება ბუდაპეშტში პრაიდის გამართვის შესახებ და მათმა მარიონეტულმა პოლიტიკოსებმა ეს ბრძანება შეასრულეს

 უნგრეთის პრემიერ-მინისტრმა ვიქტორ ორბანმა ბუდაპეშტში გამართული ყველაზე მასშტაბური ლგბტ პრაიდის ღონისძიების შესახებ თავის პირველ კომენტარში განაცხადა, რომ ეს „კიდევ ერთი დასტურია“ იმისა, თუ რატომ სჭირდება ქვეყანას კონსერვატიული მთავრობა.

ორბანის თქმით, „ბრიუსელმა გასცა ბრძანება ბუდაპეშტში პრაიდის გამართვის შესახებ და მათმა მარიონეტულმა პოლიტიკოსებმა ეს ბრძანება შეასრულეს“.

„ეს იმის დასტურია, თუ როგორი იქნებოდა ჩვენი ცხოვრება, ქვეყანას რომ არ უხელმძღვანელოს მთავრობამ, რომელიც ჩვენს სუვერენიტეტს იცავს... გუშინდელი დღის წყალობით, კიდევ უფრო დიდი დარწმუნებით ვიცით, რომ ეს ადამიანები არსად არ უნდა იყვნენ დაშვებული“, - განაცხადა ორბანმა.

მან ასევე გამოთქვა აღშფოთება პრაიდის დროს „ამაზრზენი და სამარცხვინო ქმედებების“ გამო, მათ შორის ქუსლიან ფეხსაცმელებში გამოწყობილი მამაკაცებისა და ჰორმონოთერაპიის შესახებ ბროშურების გავრცელების გამო.

ცნობისთვის, 28 ივნისს ბუდაპეშტში გამართული ლგბტ პრაიდი უნგრეთში ყველაზე მასშტაბური იყო - დიდწილად მისი აკრძალვის გარშემო ატეხილი რეზონანსის გამო. ღონისძიებას ევროპის არაერთი ქალაქის მერები დაესწრნენ, ხოლო ბუდაპეშტის ოპოზიციონერი მერი კოლონას ხელმძღვანელობდა.

მედიაში გავრცელებული ინფორმაციით, მსვლელობაში ათიათასობით ადამიანიდან 100 ათასზე მეტმა ადამიანმა მიიღო მონაწილეობა.

პრაიდის დაწყებამდე ორბანმა განაცხადა, რომ მიუხედავად იმისა, რომ პოლიციას შეეძლო მისი დაშლა, როგორც აკრძალული ღონისძიების, ისინი ამას არ გააკეთებდნენ.