რეკორდულად ცხელი ზაფხული ევროკავშირის ეკონომიკას 180 მილიარდი ევრო დაუჯდება - Politico

„წლევანდელი უკიდურესად ცხელი ზაფხული ევროკავშირის ეკონომიკას 180 მილიარდი ევრო დაუჯდება, რაც მშპ-ს დაახლოებით 1%-ს და ბლოკის მიერ 2026 წელს მიღწეულ მთლიან ზრდას უტოლდება“, - ამის შესახებ გამოცემა Politico იტყობინება.

ბანკი Triodos-ის შეფასებით, ცხელ ზაფხულში შრომის პროდუქტიულობის შემცირების გამო, ევროკავშირის მშპ, შესაძლოა, დაახლოებით 0,6 %-თ შემცირდეს, ხოლო სასოფლო-სამეურნეო წარმოების მოცულობა — 3–7%-ით.

„შედეგი მხოლოდ იმაში არ მდგომარეობს, რომ ყველაზე ცხელი ქვეყნები ყველაზე დიდ ზარალს განიცდიან. ესპანეთსა და იტალიაში ფიზიკური მოწყვლადობის დონე ყველაზე მაღალია და აბსოლუტური მაჩვენებლით ცხელი დღეების რაოდენობაც ყველაზე დიდია“, - აღნიშნულია ბანკის ანალიზში.

Politico-ს ცნობით, ივნისის შუა რიცხვებიდან ივლისის დასაწყისამდე, რეკორდული სიცხის ტალღის პერიოდში, ევროპის ექვს ყველაზე მეტად დაზარალებულ ქვეყანაში გარდაცვალების, სულ მცირე, 14 000 შემთხვევა დაფიქსირდა.

გვალვამ სერიოზული დარტყმა მიაყენა ევროპის ენერგეტიკულ სისტემასაც.

კერძოდ, ბოლო კვირების განმავლობაში დუნაის წყლის დონის მკვეთრმა შემცირებამ უნგრეთის ერთადერთ ატომურ ელექტროსადგურზე სიმძლავრის მნიშვნელოვნად შემცირება გამოიწვია.

ევროპის რამდენიმე ქვეყანაში, ჰაერის მაღალი ტემპერატურის გამო ტყის მასშტაბურ ხანძრებსაც ებრძვიან.